ရွှေဖီမြေ၊ ဇန်နဝါရီ ၁၃ ရက်၊ မြင်းခြံ
မန္တလေးတိုင်း မြင်းခြံနဲ့ တောင်သာမြို့နယ်ကြားမှာ အင်အား ၁၀၀ နီးပါးရှိတဲ့ စစ်ကောင်စီ စစ်ကြောင်းကို PDF တွေ ကြားဖြတ်တိုက်ခိုက်ရာ ၂၀ ဦး သေဆုံးပြီး လက်နက်ခဲယမ်း သိမ်းဆည်းရမိခဲ့တယ်လို့ အမျိုးသား ညီညွတ်ရေးအစိုးရ- NUG ရဲ့ ကာကွယ်ရေး ဝန်ကြီးဌာနက ထုတ်ပြန်လာပါတယ်။
မနေ့ ဇန်နဝါရီ ၁၂ ရက်မှာ မြင်းခြံ-တောင်သာ လမ်းပိုင်းရှိ နန်းမြင့်နဲ့ တောင်ရှေ့ရွာဘက် စစ်ကြောင်း ထိုးပြီး ပြန်လာတဲ့ စစ်ကောင်စီရဲ့ ခြေမြန်တပ်ရင်း ၁၅၊ ရဲနဲ့ ပျူစောထီး ပူးပေါင်းအင်အား ၁၀၀ နီးပါးကို PDF တွေက ကြားတိုက်ခိုက်ခဲ့တယ်လို့ ဆိုပါတယ်။
တိုက်ခိုက်မှုအတွင်း စစ်တပ်ဘက်က ၂၀ ဦး သေဆုံးပြီး MA-1 ၁ လက်၊ MA-3 ၆ လက်၊ G-3 ၃ လက်၊ MA ကျည် ၅၁ တောင့်၊ G-3 ကျည် ၁၅၉ တောင့်၊ 9 Volt ကျည် ၈ တောင့်၊ ကျည်အိမ် ၂၄ ခု၊ Jammer အကြီး ၁ လုံးနဲ့ ကျောပိုး Jammer ၁ လုံး သိမ်းဆည်းရမိခဲ့ပါတယ်။
စစ်တပ်ဘက်ကတော့ စစ်ကြောင်း တိုက်ခိုက်ခံရတာနဲ့ ပတ်သက်ပြီး တစ်စုံတစ်ရာ သတင်းထုတ်ပြန်ထားတာ မရှိသေးပါဘူး။
ဒီတိုက်ခိုက်မှုကို PDF မြင်းခြံခရိုင် တပ်ရင်း ၁၊ ၂၊ ၇ တို့ ပူးပေါင်းပြီး တိုက်ခိုက်ခဲ့တာပဲ ဖြစ်ပါတယ်။
