မိုင်းရူပ၊ ဇန်နဝါရီ ၁၃ ရက်၊ ကျောက်မဲ
တအာင်းတပ်မတော်- PSLF/TNLA ထိန်းချုပ်ထားတဲ့ ရှမ်းမြောက် ကျောက်မဲမြို့ကို စစ်ကောင်စီတပ်က ဗုံးကြဲတိုက်ခိုက်ခဲ့ပါတယ်။
ဒီနေ့ ဇန်နဝါရီ ၁၃ ရက် နေ့လယ် ၃ နာရီဝန်းကျင်မှာ ကျောက်မဲမြို့ တိုးဂိတ်အနီးတစ်ဝိုက်ကို ဗုံးကြဲတိုက်ခဲ့တာဖြစ်ပြီး ထိခိုက်သေဆုံးမှု မရှိကြောင်း ကျောက်မဲဒေသခံတစ်ဦးက ရွှေဖီမြေကို ပြောပါတယ်။
“တိုးဂိတ်ဝန်းကျင်မှာ လာကြဲတာ။ တိုးဂိတ်အပေါ်က နတ်ရေကန် ဘုန်းကြီးကျောင်း ရှိတယ်”
တော်လှန်ရေးအင်အားစုနဲ့ ပူးပေါင်းပြီး စစ်တပ်ကို အပြီးတိုင် ချေမှုန်းတော်လှန်မယ်လို့ TNLA က မနေ့ ဇန်နဝါရီ ၁၂ ရက်မှာ ကျရောက်တဲ့ တအာင်းအမျိုးသား တော်လှန်ရေးနေ့မှာ ထုတ်ပြန်ပြီး တစ်ရက်အကြာ TNLA ထိန်းချုပ်ထားတဲ့ ကျောက်မဲမြို့ကို ဗုံးကြဲတိုက်ခိုက်ခဲ့တာပဲ ဖြစ်ပါတယ်။
ကျောက်မဲမြို့ဟာ ၁၀၂၇ စစ်ဆင်ရေး ဒုတိယလှိုင်းအတွင်း TNLA တိုက်ခိုက်သိမ်းပိုက်ပြီး အုပ်ချုပ်ရေးယန္တရား လည်ပတ်နေတဲ့မြို့ ဖြစ်ပါတယ်။
ပြီးခဲ့တဲ့ ဇန်နဝါရီ ၈ ရက် နေ့လယ် ၁ နာရီဝန်းကျင်ကလည်း TNLA ထိန်းချုပ်ထားတဲ့ မန္တလေးတိုင်း မိုးကုတ်မြို့ကို Y-12 လေယာဉ်နဲ့ ဗုံး ၂၀ ကျော် ကြဲချတိုက်ခိုက်ခဲ့ပါတယ်။
