မိုင်းရူပ၊ အောက်တိုဘာ ၂၈ ရက်၊ သပိတ်ကျင်း
တော်လှန်ရေးတပ်တွေ ထိန်းချုပ်ထားတဲ့ မန္တလေးတိုင်း သပိတ်ကျင်းမြို့နယ် ဇရပ်ကွင်းရွာကို စစ်ကောင်စီတပ်က ဂျက်လေယာဉ်နဲ့ ဗုံးထပ်မံကြဲချတိုက်ခိုက်ခဲ့တယ်လို့ ရွှေဖီမြေ က စုံစမ်းသိရှိရပါတယ်။
ဒီနေ့ အောက်တိုဘာ ၂၈ ရက် ညနေ ၄ နာရီဝန်းကျင်မှာ စစ်ကောင်စီက ဇရပ်ကွင်းကျေးရွာထဲကို ဂျက်လေယာဉ်နဲ့ ဗုံး ၄ ကြိမ် ကြဲချတိုက်ခိုက်ခဲ့ပြီး နေအိမ်တချို့ ထိခိုက်ပျက်စီးခဲ့တယ်လို့ မြေပြင်အခြေအနေသိရှိသူတစ်ဦးက ရွှေဖီမြေ ကို ပြောပါတယ်။
“လေယာဉ်နဲ့ ၄ ကြိမ် လာကြဲသွားတယ်။ အဲတာတော့ အထိအခိုက်တော့ မရှိဘူး။ ရွာထဲကျတော့ နေအိမ်တွေတော့ ပျက်စီးသွားတယ်” လို့ ဆိုပါတယ်။
ဒါ့အပြင် မနေ့ အောက်တိုဘာ ၂၇ ရက် မနက် ၁၁ နာရီဝန်းကျင်မှာလည်း စစ်ကောင်စီတပ်က ဇရပ်ကွင်းကျေးရွာထဲ ဒရုန်းဗုံးနဲ့ ကြဲချတိုက်ခိုက်ခဲ့ရာ အမျိုးသား ၂ ဦး သေဆုံးခဲ့ပါတယ်။
စစ်ကောင်စီတပ်ဟာ တော်လှန်ရေးတပ်တွေ ထိန်းချုပ်ထားတဲ့ သပိတ်ကျင်းမြို့နယ်ထဲကို ထိုးစစ်ဆင်မှုတွေ ဆက်တိုက်လုပ်ဆောင်နေသလို လေယာဉ်နဲ့ ဗုံးကြဲတိုက်ခိုက်တာတွေ မကြာခဏ ပြုလုပ်နေတာ တွေ့ရပါတယ်။
လက်ရှိ စစ်ကောင်စီတပ်ဟာ သပိတ်ကျင်းမြို့နယ် ဖော့တော့လမ်းဆုံအထိ ရောက်ရှိနေပြီး မိုးကုတ်ဘက် ထိုးစစ်ဆင်ဖို့ ကြိုးစားနေတယ်လို့ ရှေ့တန်းသတင်းအရင်းအမြစ်တွေက ပြောပါတယ်။
ပြီးခဲ့တဲ့ အောက်တိုဘာ ၂၄ ရက်မှာလည်း သပိတ်ကျင်းမြို့နယ် ရင်ခတ်ပင်ကျေးရွာကို စစ်ကောင်စီတပ်က လေကြောင်းကနေ ဗုံးကြဲတိုက်ခိုက်လို့ ဒေသခံ ၃ ဦး ပွဲချင်းပြီး သေဆုံးကာ ၁၃ ဦး ထက်မနည်း ထိခိုက်ဒဏ်ရာရခဲ့ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှု နားဆင်နိုင်ပါတယ်။
