အိုက်ပွီး၊ အောက်တိုဘာ ၂၇ ရက်၊ တီးတိန်
ချင်းပြည်နယ်၊ တီးတိန်မြို့မှာ စစ်ကောင်စီက တိုက်ပွဲမရှိဘဲ လေကြောင်းကနေ နှစ်ရက်ဆက်တိုက် တပ်အင်အားတွေဖြည့်တင်းနေတယ်လို့ ဒေသခံတွေဆီက သိရပါတယ်။
တီးတိန်မြို့ ခလရဘ၂၆၉ တပ်ရင်းကို စစ်ကောင်စီက မနေ့ အောက်တိုဘာ ၂၆ ရက်နေ့၊ နေ့လယ်က လေယာဥ်တစ်စီးနဲ့ ၅ ကြိမ်ခန့် တပ်အင်အားဖြည့်တင်းသွားတာ ဖြစ်ပါတယ်။
“ကလေးမြို့ကနေ MI 17 လေယာဥ်တစ်စီးနဲ့ မနေ့က ၅ ကြိမ်လောက် တီးတိန်မြို့ ခလရ ၂၆၉ တပ်ရင်းကုန်း အင်အားဖြည့်သွားပါတယ်”လို့ တီးတိန်မြို့ခံတစ်ဦးက ရွှေဖီမြေသို့ ပြောပါတယ်။
ဒါ့အပြင် စစ်ကောင်စီဟာ ဒီနေ့ အောက်တိုဘာ ၂၇ ရက်နေ့မနက်မှာလည်း ကလေးမြို့ကနေ တီးတိန်မြို့ ခလရ ၂၆၉ တပ်ရင်းကို ထပ်မံ အင်အားဖြည့်တင်းနေတယ်လို့ သိရပါတယ်။
“တီးတိန်မှာ ဘာတိုက်ပွဲမှမရှိဘဲနဲ့ ဒီနေ့လည်း လေကြောင်းကနေ လေယာဥ် ၅ကြိမ်လောက် လာပြီး အင်အားဖြည့်တင်းသွားပါတယ်။ မြို့ထဲမှာက ဘာမှ ထူးခြားတာ မရှိသေးဘူး။ ပုံမှန်ပါပဲ။” လို့ တီးတိန်မြို့ခံတစ်ဦးက ရွှေဖီမြေသို့ ပြောပါတယ်။
ဒါ့အပြင် တီးတိန်မြို့နယ် CDF CDM -Syin ထိန်းချုပ်ထားတဲ့ ကလေး – တီးတိန် ကားလမ်းကိုလည်း ဒီနေ့ အောက်တိုဘာ ၂၇ ရက်မနက် ကလေးမြို့ကနေ မြေပြင်က အင်အားအလုံးရင်းနဲ့ ထိုးစစ်ဆင်လာတယ်လို့ သိရပါတယ်။
ဒါ့ကြောင့် ကလေး-တီးတိန်ကားလမ်းကို ယာယီပိတ်ထားတယ်လို့ CDF CDM – Syin က ဒီနေ့ အောက်တိုဘာ ၂၇ ရက်နေ့မှာ ထုတ်ပြန်ထားပါတယ်။
တီးတိန်မြို့ဟာ ချင်းပြည်နယ်မှာ စစ်ကောင်စီထိန်းချုပ်ထားတဲ့ မြို့နှစ်ခုအနက် တစ်မြို့ဖြစ်ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှု နားဆင်နိုင်ပါတယ်။
