လွေးလာဝ်ဇာရ်၊ အောက်တိုဘာ ၂၇ ရက်၊ မိုးမိတ်
တအာင်းတပ် ထိန်းချုပ်ထားတဲ့ မိုးမိတ်မြို့နယ်နဲ့ မန္တလေးတိုင်း သပိတ်ကျင်းမြို့နယ်မှာ စစ်ကောင်စီတပ်က လေကြောင်းနဲ့ ထပ်မံ ဗုံးကြဲတိုက်ခိုက်ခဲ့တယ်လို့ သိရပါတယ်။
ဒီနေ့ အောက်တိုဘာ ၂၇ ရက် နေ့လယ် ၁၂ ခွဲဝန်းကျင်မှာ မိုးမိတ်မြို့နယ်က အောက်မကျီးရွာနဲ့ မြစ်ဆုံရွာကို စစ်တပ်က ဂျက်ဖိုက်တာ တစ်စီးသုံးပြီး ပေါင် ၅၀၀ တစ်လုံးနဲ့ ပေါင် ၂၅၀ တစ်လုံး လာရောက်ကြဲချတိုက်ခိုက်ခဲ့ပါတယ်။
အလားတူ ဒီနေ့ အောက်တိုဘာ ၂၇ ရက် မနက် ၁ဝ နာရီကျော်မှာလည်း သပိတ်ကျင်းမြို့နယ် ကျောက်ဖြူရွာကို လေယာဉ်နဲ့ ပေါင် ၂၅၀ ဗုံးတစ်လုံး လာရောက်ကြဲချတိုက်ခိုက်ခဲ့တယ်လို့ သိရပါတယ်။
ဖြစ်စဉ်သိရှိသူ တစ်ဦးက “ခုနတုန်းက လာကြဲသွားတယ်။ မြစ်ဆုံရွာမှာလည်း ချသွားတယ်။ ထိခိုက်မှုတော့ မရှိဘူး။ အဲရွာမှာဘက်မှာ တိုက်ပွဲလည်းဖြစ်တာ မရှိဘူး။ အောက်မကျီးဘက်လည်း ကြဲသွားတယ်” လို့ ပြောပါတယ်။
လေယာဉ်နဲ့ လာရောက် ပစ်လိုက်တဲ့ ဗုံးကြောင့် လူထိခိုက်မှုမရှိခဲ့ပေမယ့် မိုးမိတ်မြို့နယ် အောက်မကျီးရွာက နေအိမ် ၁ လုံးနဲ့ သပိတ်ကျင်းမြို့နယ် ကျောက်ဖြူရွာက နေအိမ် ၁ လုံးလည်း ထိမှန်ပျက်စီးခဲ့တယ်လို့ ဆိုပါတယ်။
ပြီးခဲ့တဲ့ အောက်တိုဘာ ၂၄ ရက်မှာလည်း သပိတ်ကျင်းမြို့နယ် ရင်ခတ်ပင်ကျေးရွာကို စစ်ကောင်စီတပ်က လေကြောင်းကနေ ဗုံးကြဲတိုက်ခိုက်လို့ ဒေသခံ ၃ ဦး ပွဲချင်းပြီး သေဆုံးကာ ၁၃ ဦး ထက်မနည်း ထိခိုက်ဒဏ်ရာရခဲ့ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှု နားဆင်နိုင်ပါတယ်။
