အိုက်ပွီး၊ အောက်တိုဘာ ၂၅ ရက်၊ ကလေး
စစ်ကိုင်းတိုင်း၊ ကလေးမြို့နယ်မြောက်ပိုင်းမှာ နေအိမ်သို့ ရိက္ခာသွားယူတဲ့ စစ်ဘေးရှောင် ချင်းအမျိုးသားတစ်ဦး ပစ်သတ်ခံရပြီး သေဆုံးကာ တစ်ဦးဒဏ်ရာရရှိခဲ့တယ်လို့ စစ်ဘေးရှောင်အမျိုးသားတစ်ဦးက ရွှေဖီမြေသို့ ပြောပါတယ်။
သေဆုံးသူဟာ ကလေးမြို့နယ်၊ ပြည်တော်သာကျေးရွာက အသက် (၄၀) အရွယ် ဦးကပ်ရှန်းမုန်ဖြစ်ပါတယ်။
ဦးကပ်ရှန်းမုန်နဲ့အတူ အမျိုးသားတစ်ဦးတို့ဟာ မနေ့ အောက်တိုဘာလ ၂၄ ရက်နေ့ ၎င်းတို့ စစ်ဘေးရှောင်ရာ အောင်ရွာကနေ ပြည်တော်သာကျေးရွာက နေအိမ်ကို ရိက္ခာသွားယူရာမှာ စစ်ကောင်စီတပ်ရဲ့ ပစ်သတ်ခံရတာဖြစ်ပါတယ်။
“စစ်ဘေးရှောင်တုန်းက ပါလာတဲ့ ရိက္ခာတွေလည်း ကုန်သွားလို့ ရွာမှာသွားယူတာ။ စစ်ကောင်စီ စစ်ကြောင်းကလည်း မရှိတော့ဘူး ထင်လို့သွားကြတာ။ အဲမှာအပစ်ခံရပြီး ပွဲချင်း ဆုံးသွားတယ်။ နောက်ထပ်အမျိုးသားတစ်ယောက်ကလည်း ခြေထောက်မှာ ဒဏ်ရာရတယ်။”လို့ စစ်ဘေးရှောင်တစ်ဦးက ရွှေဖီမြေသို့ ပြောပါတယ်။
ပြီးခဲ့တဲ့ အောက်တိုဘာ ၁၇ ရက်နေ့က ကလေးမြို့နယ်မြောက်ပိုင်းမှာ စစ်ကောင်စီ စစ်ကြောင်းထိုးတာကြောင်း ပြည်တော်သာကျေးရွာအပါဝင် ပြည်သူတွေ သောင်းနဲ့ချီဟာ ဘေးလွတ်ရာကို ထွက်ပြေးတိမ်းရှောင်နေကြတာဖြစ်ပါတယ်။
အောက်တိုဘာလ ၂၂ ရက်နေ့ကလည်း စစ်ကောင်စီ လက်နက်ကြီးကျည် ပစ်ခတ်တိုက်ခိုက်ခဲ့တာကြောင့် ဒိုးနွယ်ရွာနဲ့ ကျော်ရွာမှာ အရပ်သား ၃ ဦး ထိခိုက်ဒဏ်ရာရရှိခဲ့ပါတယ်။
ကလေးမြို့နယ်မှာ စစ်ကောင်စီ စစ်ကြောင်းကြောင့် ထွက်ပြေးတိမ်းရှောင်နေကြတဲ့ စစ်ဘေးရှောင်တစ်သောင်းကျော် အရေးပေါ် စားဝတ်နေရေး ရိက္ခာတွေအပြင် ကျန်းမာရေးစောင့်ရှောက်မူလည်း အကူအညီလိုအပ်နေတယ်လို့ သိရပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှု နားဆင်နိုင်ပါတယ်။
