ဖားကန့်မှာ မြေစာပုံပြိုကျတာကြောင့် အမျိုးသား ၂ ဦး သေဆုံးပြီး ကလေးတစ်ဦး ဒဏ်ရာရ

လွေးဇွန်မိုး၊ အောက်တိုဘာ ၂၄ ရက်၊ ဖားကန့်

ကချင်ပြည်နယ် ဖားကန့်မြို့နယ် နမ့်မှော်ကျေးရွာမှာ မြေစာပုံပြိုကျတာကြောင့် အမျိုးသား ၂ ဦး မြေပိသေဆုံးပြီး အသက် ၁၄ နှစ်အရွယ် ကလေးတစ်ဦး ဒဏ်ရာရခဲ့တယ်လို့ သိရပါတယ်။

မနေ့ အောက်တိုဘာလ ၂၃ ရက် ညနေ ၄ နာရီဝန်းကျင်မှာ နမ့်မှော်ကျေးရွာ ရပ်ကွက်(၄) ရှိ ပအို့မြေစာပုံဟောင်း လုပ်ကွက်တစ်ခု ပြိုကျခဲ့ရာ ရေမဆေးကျောက် ရှာဖွေသူ ၂ ဦး မြေပိသေဆုံးခဲ့တာဖြစ်တယ်လို့ ဖြစ်စဥ်သိရှိသူ အမျိုးသားတစ်ဦးက ပြောပါတယ်။

“မျက်မြင်တစ်ဦးမှ ပေးပို့တာပါ။ သတင်းတော့ မှန်ပါတယ်။ မြေစာပုံအဟောင်းပါ” လို့ ဆိပါတယ်။

သေဆုံးသွားတဲ့ အမျိုးသား ၂ ​ဦးရဲ့ ရုပ်အလောင်းကိုတော့ ပြန်လည်ရှာတွေ့ခဲ့ပြီလို့ အထက်ပါအမျိုးသားက ဆိုပါတယ်။

အလားတူ ပြီးခဲ့တဲ့ ဇူလိုင်လ ၂၁ ရက် မနက် ၉ နာရီခွဲကျော်မှာလည်း လုံးခင်းကျေးရွာအုပ်စု မှော်စီစာရွာအနီးမှာရှိတဲ့ စိန်စိန်နဲ့ ဂျတ်ပါဝါကုမ္ပဏီရဲ့ လုပ်ကွက်ဟောင်းအတွင်း မြေစာပုံ ပြိုကျခဲ့တာကြောင့် ရေမဆေးကျောက် ရှာဖွေနေသူ ၂၀ ဦးထက်မနည်း မြေစာပြိုကျမှုနဲ့အတူ သေဆုံးသွားခဲ့ပါတယ်။

ဒါ့အပြင် ပြီးခဲ့တဲ့ ဇန်နဝါရီ ၁၃ ရက်ကလည်း ဖားကန့်မြို့နယ် ဆိပ်မူကျေးရွာအုပ်စု စပေါ့ရွာအနီးက ရတနာအဓိပတိ ကျောက်လုပ်ကွက် မြေစာပုံနွံကန် ပွင့်ထွက်မှုကြောင့် သေဆုံးသူ ၃၀ ကျော် ရှိခဲ့ပါတယ်။

~ ~ ~

ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။

Shwe Phee Myay YouTube

Shwe Phee Myay Telegram