အိုက်ပွီး၊ အောက်တိုဘာ ၂၂ ရက်၊ ကလေး
စစ်ကိုင်းတိုင်း၊ ကလေးမြို့နယ်မှာ စစ်ကောင်စီ စစ်ကြောင်းထိုးတာကြောင့် ထွက်ပြေးတိမ်းရှောင်နေရတဲ့ ပြည်သူ ၁၀,၀၀၀ ကျော် အရေးပေါ်အကူအညီတွေ လိုအပ်နေတယ်လို့ ဒေသခံတွေနဲ့ တော်လှန်ရေးတပ်ဖွဲ့တွေဆီက သိရပါတယ်။
ကလေမြို့နယ်တောင်ပိုင်းနဲ့ မြောက်ပိုင်းမှာ အောက်တိုဘာလ ၁၇ ရက်နေ့ကစပြီး စစ်ကောင်စီတပ် စစ်ကြောင်းထိုးတာကြောင့် အဲဒေသမှာရှိတဲ့ ပြည်သူတွေဟာ ဘေးလွတ်ရာကို အရေးပေါ် ထွက်ပြေးတိမ်းရှောင်နေကြတာဖြစ်ပါတယ်။
“ပြည်သူတွေက ရွာထဲမှာ စစ်ကြောင်းဝင်လာတာနဲ့ သူတို့က ရွာလုံးကျွတ် ထွက်ပြေးကြတယ်။ တချို့က စစ်ကြောင်းနဲ့ ရွာဝေးသွားရင် ရွာထဲပြန်ဝင်တာရှိတယ်။ ကလေးမြို့နယ်တောင်ပိုင်းနဲ့ မြောက်ပိုင်း တစ်လျှောက်လုံး အကုန်ပြေးကြရတယ်။”လို့ ဒေသခံတော်လှန်ရေးတပ်ဖွဲ့ဝင်တစ်ဦးက ရွှေဖီမြေသို့ ပြောပါတယ်။
အရေးပေါ်ထွက်ပြေးသူတွေထဲမှာ ကလေးတွေ၊ ကိုယ်ဝန်ဆောင် မိခင်တွေ၊အသက်ကြီးပိုင်းတွေလည်းပါတာကြောင့် အခြေခံစားနပ်ရိက္ခာတွေအပြင် ကျန်းမာရေးစောင့်ရှောက်မှုတွေလည်း အကူအညီတွေ လိုအပ်နေတာဖြစ်ပါတယ်။
“ကလေးတွေ အသက်ကြီးပိုင်းတွေ ပိုများနေတယ်။ သူတို့က တခြားသူတွေထက် လိုအပ်ချက်တွေ ပိုများတယ်။ အခု သူတို့တွေ အဆင်ပြေသလို နေကြရတယ်။ စားသောက်ကြတယ်။ ရွာပြန်လို့မရသေးတဲ့အခြေအနေမျိုးမှာ ကျန်းမာရေး စောင့်ရှောက်မှုတွေ လိုအပ်တယ်။ ဆေးဝါးတွေ အကူအညီလိုလာတယ်။ စားနပ်ရိက္ခာတွေလိုလာတယ်”လို့ စစ်ဘေးရှောင်တစ်ဦးက ရွှေဖီမြေသို့ ပြောပါတယ်။
အရေးပေါ် ထွက်ပြေးတိမ်းရှောင်သူတွေအတွက် အရေးပေါ်တုန့်ပြန်ရေးနဲ့ ကူညီရေးအဖွဲ့အစည်းကို ကလေးမြို့လူထုတိုက်ပွဲဦးဆောင်ကော်မတီက ဖွဲ့စည်းထားပြီး ပြည်တွင်းပြင်ပရှိ ပြည်သူများအနေနဲ့ လိုအပ်ချက်တွေကို ကူညီပေးဖို့ တိုက်တွန်းထားပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
