ပျားကြီး၊ အောက်တိုဘာ ၂၂ ရက်၊ မန္တလေး
မန္တလေးမြို့မှာ ငလျင်ဒဏ်သင့် အထပ်မြင့်တည်းခိုခန်းတစ်ခုကို ဖြိုဖျက်နေချိန် အနီးဝန်းကျင်က နေအိမ်တစ်လုံးပေါ်ကို ပြိုကျခဲ့ရာကနေ အိမ်အတွင်း ၄ နာရီနီးပါးကြာ ပိတ်မိနေသူကို အသက်ရှင်လျက် ပြန်လည်ကယ်ထုတ်နိုင်ခဲ့တယ်လို့ ဒေသခံတွေနဲ့ ပရဟိတအသင်းသားတွေက ရွှေဖီမြေကို အတည်ပြုပြောဆိုပါတယ်။
မနေ့ အောက်တိုဘာ ၂၁ ရက် ညနေ ၃ နာရီဝန်းကျင်မှာ ချမ်းအေးသာဇံမြို့နယ်၊ ဆေးရိုးဝင်း၊ ၃၃ လမ်းနဲ့ ၃၄ လမ်းကြား၊ ၈၅ လမ်းက အန္တရာယ်ရှိ တည်းခိုခန်းတစ်ခုကို ဖြိုဖျက်နေချိန် အနီးအနားမှာရှိတဲ့ နေအိမ်တစ်လုံးပေါ်ကို ပြိုကျခဲ့ပြီး သက်လတ်ပိုင်းအရွယ်အမျိုးသားတစ်ဦး နေအိမ်အတွင်း ပိတ်မိနေခဲ့တာဖြစ်ပါတယ်။
“မီးခိုးတွေနဲ့ဆိုတော့ အသက်ရှင်ဖို့ မလွယ်လောက်ဘူးလို့ ထင်နေတာ။ အခု အသက်ရှင်လျက် ပြန်ထုတ်နိုင်ခဲ့တယ်။ ထိခိုက်ဒဏ်ရာတချို့တော့ ရှိတာပေါ့” လို့ ဒေသခံ ပရဟိတအသင်းသားတစ်ဦးက ရွှေဖီမြေကို ပြောပါတယ်။
အဆောက်အဦးပြိုကျချိန်မှာ မီးလောင်မှုလည်း ဖြစ်ပွားခဲ့တာကြောင့် အသင့်စောင့်ပေးထားတဲ့ မီးသတ်ကားတွေက ၁၅ မိနစ်ဝန်းကျင်ကြာ ငြိမ်းသတ်ခဲ့ရတဲ့အတွက် ပတ်ဝန်းကျင်တခုလုံး မီးခိုးတွေနဲ့ ဖုံးအုပ်နေပြီး ရှာဖွေကယ်ဆယ်ရေးလုပ်ငန်းတွေကို အနှောက်အယှက်ဖြစ်စေခဲ့တာ တွေ့ရပါတယ်။
“တိုင်းမှူးလားဘာလားတော့ မသိဘူး။ တစ်ယောက်လာကြည့်လို့ မီးသတ်တွေက မီးသတ်ရတာတမျိုး သူ့ရှင်းပြရတာတမျိုးနဲ့ဆိုတော့ အချိန်တွေ ပိုကြာကုန်တာပေါ့” လို့ ဖြစ်စဥ်ကို အနီးကပ်စောင့်ကြည့်ခဲ့တဲ့ ဒေသခံအမျိုးသားတစ်ဦးက ပြောပါတယ်။
မတ်လ ၂၈ ရက်က လှုပ်ခတ်ခဲ့တဲ့ အင်အားပြင်း စစ်ကိုင်းငလျင်ဒဏ်ကြောင့် ရာနဲ့ချီတဲ့ အန္တရာယ်အဆောက်အဦးတွေရှိခဲ့ပြီး ၇ လနီးပါးကြာတဲ့အထိ ဖြိုဖျက်မှု မလုပ်သေးတဲ့ အဆောက်အဦးတွေ အများအပြားကျန်ရှိနေသေးတဲ့အတွက် အခုဖြစ်စဥ်ကြောင့် အန္တရာယ်ရှိ အဆောက်အဦးတွေ အနီးဝန်းကျင်မှာ နေထိုင်နေရသူတွေအနေနဲ့ စိုးရိမ်ထိတ်လန့်မှုတွေ ရှိလာတယ်လို့ ဒေသခံတွေက ဆိုပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
