မိုင်းရူပ၊ အောက်တိုဘာ ၁၉ ရက်၊ မိုးကုတ်
တအာင်းတပ်မတော်- PSLF/TNLA ထိန်းချုပ်ထားတဲ့ မိုးကုတ်မြို့အနောက်ပိုင်း ကျောက်ဖားရွာကို စစ်ကောင်စီက ဒီနေ့အောက်တိုဘာ ၁၉ ရက် ၂ နာရီဝန်းကျင်မှာ ဂျက်ဖိုက်တာလေယာဥ်နဲ့ ဗုံးကြဲတိုက်ခိုက်ခဲ့ပါတယ်။
“ကျောက်ဖာရွာနဲ့ ရေအေးရွာကြား ကြက်ခြံမှာ ဂျက်လေယာဥ်နဲ့ လာကြဲသွားတယ်။ ထိခိုက်ဒဏ်ရာရတာတော့ မရှိဘူး။ နေအိမ်ပျက်စီးတာတော့ရှိတယ်” လို့ မိုးကုတ်ဒေသခံတစ်ဦးက ရွှေဖီမြေကို ပြောပါတယ်။
စစ်ကောင်စီတပ်ဟာ ဒီနေ့ နေ့လည် ၁ နာရီဝန်းကျင်ကစပြီး တအာင်းတပ်ထိန်းချုပ်ထားတဲ့ မန်တုံ၊ နမ့်ဆန်၊ မိုင်းငေါ့နဲ့ မိုးကုတ်မြို့တွေကို နာရီပိုင်းအတွင်း ဂျက်လေယာဥ်နဲ့ ဗုံးကြဲတိုက်ခိုက်ခဲ့တာ ဖြစ်ပါတယ်။
မန်တုံမြို့ အောင်ချမ်းသာရပ်ကွက်ဗုံးကြဲတိုက်ခိုက်ခံရမှုမှာ အမျိုသမီးတစ်ဦးထိခိုက်ဒဏ်ရာရပြီး နေအိမ် ၅ လုံးထက်မနည်း ပျက်စီးခဲ့ပါတယ်။
နမ့်ဆန်နဲ့ မိုင်းငေါ့မြို့ပေါ် ဗုံးကြဲတိုက်ခိုက်မှုအတွင်းထိခိုက်သေဆုံးမှုအခြေအနေကိုတော့ ရွှေဖီမြေက ဆက်လက်စုံစမ်းနေဆဲ ဖြစ်ပါတယ်။
မနေ့ အောက်တိုဘာ ၁၈ ရက် ညပိုင်း ၈ နာရီခွဲဝန်းကျင်မှာ နမ့်ဆန်မြို့နယ် ကွမ်ဟယ်ကျေးရွာလည်မှာရှိတဲ့ နတ်စင်အောက်ကို စစ်ကောင်စီက ဂျက်ဖိုက်တာနဲ့ ပေါင် ၅၀၀ ဗုံးကြဲချတိုက်ခိုက်ခဲ့ပြီး သေဆုံးသူ၆ ဦးနဲ့ ဒဏ်ရာရသူ ၄ ဦးရှိခဲ့ပါတယ်။
တအာင်းတပ်ထိန်းချုပ်ထားတဲ့ဒေသမှာ ၃ ပတ်အတွင်း စစ်ကောင်စီက ဗုံးကြဲတိုက်ခိုက်မှု ၂၇ ကြိမ်ပြုလုပ်ခဲ့ပြီး သေဆုံးသူ ၄၀ နီးပါးနဲ့ ဒဏ်ရာရသူ ၄၀ ကျော်အထိ ရှိခဲ့ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှု နားဆင်နိုင်ပါတယ်။
