ပျားကြီး၊ အောက်တိုဘာ ၁၈ ရက်၊ ဆားလင်းကြီး
စစ်ကိုင်းတိုင်း ဆားလင်းကြီးမြို့နယ်မှာ စစ်ကောင်စီရဲ့ လက်နက်ကြီးပစ်ခတ်မှု၊ ပါရာမော်တာတွေနဲ့ ဗုံးကြဲမှု၊ မြေပြင်စစ်ကြောင်းထိုးမှုတွေကြောင့် ကျေးရွာပေါင်း ၂၅ ရွာထက်မနည်း ဘေးလွတ်ရာကို ထွက်ပြေးတိမ်းရှောင်နေရတယ်လို့ ဒေသခံတွေက ပြောပါတယ်။
ဒီကနေ့ အောက်တိုဘာလ ၁၈ ရက် မနက်အစောပိုင်းကစပြီး တရုတ်နဲ့ စစ်အုပ်စုရဲ့ ဝမ်ပေါင်ကြေးနီကုမ္ပဏီက စစ်ကြောင်း ၃ ကြောင်းဟာ အနီအနားကျေးရွာတွေကိုစစ်ကြောင်းထိုးနေတာဖြစ်ပြီး မုံရွာမြို့နဲ့ န.မ.ခဖက်ကနေလည်း လေကြောင်းနဲ့ လက်နက်ကြီးပစ်ကူတွေ အဆက်မပြတ်ပြုလုပ်ပေးနေတာဖြစ်ပါတယ်။
“အရှေ့ဖက်ကမ်း(မုံရွာဖက်ခြမ်း) ကနေ လက်နက်ကြီးနဲ့ တရစပ်ထုနေတာ။ ပါရာမော်တာကလည်း တချိန်လုံးတက်ပြီး မဲမဲမြင်ရာ ဗုံးလိုက်ကြဲနေတာပဲ။ အကုန်ပြေးနေရပြီ။ အခုကို ပါရာမော်တာနဲ့ ၂ လုံးကြဲသွားသေးတယ်” လို့ အသက် ၅၀ အရွယ် ဒေသခံအမျိုးသားတစ်ဦးက ပြောပါတယ်။
လက်ရှိအချိန်မှာ တုံ၊ ဖောင်းကတာ၊ ထန်းတောကြီး၊ ထန်းပု၊ ညောင်ပင်ကြီး၊ ရွှေလှေ၊ တောကျောင်း၊ လယ်တီစတဲ့ကျေးရွာတွေအပါအဝင် ကျေးရွာပေါင်း၂၅ ရွာက လူပေါင်း ၂ သောင်းနီးပါးဟာ ဘေးလွတ်ရာကိုထွက်ပြေးတိမ်းရှောင်နေရတာဖြစ်ပြီး သတင်းရေးသားနေချိန် ညနေ ၃ နာရီအထိ ပါရာမော်တာတွေနဲ့ ဗုံးကြဲတိုက်ခိုက်မှုတွေ ရှိနေသေးတယ်လို့ ဒေသခံတွေက ဆိုပါတယ်။
စစ်ကောင်စီဟာ ပြည်သူတွေကိုပစ်မှတ်ထားပြီး တိုက်ခိုက်နေတာဖြစ်ပြီး လတ်တလောမှာ ထွက်ပြေးတိမ်းရှောင်နေရဆဲဖြစ်တာကြောင့် ထိခိုက်မှုတစုံတရာ ရှိမရှိကိုတော့ မသိရသေးဘူးလို့ ဒေသခံစစ်ရှောင်ကူညီပေးနေသူတစ်ဦးက ပြောပါတယ်။
စစ်ကောင်စီဟာ ဒီဇင်ဘာလကုန်ပိုင်းမှာ ကျင်းပမယ့် အတုအယောင်ရွေးကောက်ပွဲအတွက် သူတို့စိုးမိုးထားနိုင်မှုမရှိတဲ့ ဒေသတွေကို အင်အားအလုံးအရင်းနဲ့ စစ်ကြောင်းထိုးပြီး နယ်မြေစိုးမိုးမှုရရှိဖို့ လုပ်ဆောင်နေတာဖြစ်ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
