မိုင်းရူပ၊ အောက်တိုဘာ ၁၆ ရက်
စစ်ကောင်စီ ဦးဆောင်ကျင်းပမယ့် ရွေးကောက်ပွဲကို အပြည့်အဝ ထောက်ခံကြောင်း “ဝ”ပြည်သွေးစည်းညီညွတ်ရေးတပ်မတော်- UWSA ရဲ့ လားရှိုးမြို့အခြေစိုက် ပြင်ပဆက်ဆံရေးတာဝန်ခံ ဦးညီရန်းက ပြောပါတယ်။
မနေ့ အောက်တိုဘာ ၁၅ ရက်မှာကျရောက်တဲ့ တစ်နိုင်ငံလုံးအပစ်ခတ်တိုက်ခိုက်မှုရပ်စဲရေးသဘောတူစာချုပ်- NCA လက်မှတ်ရေးထိုးခြင်း ၁၀ နှစ်ပြည့်မှာ ပြောကြားခဲ့ပါတယ်။
” ရွေးကောက်ပွဲကို ကျွန်တော်တို့ ဝ အဖွဲ့အနေနဲ့ အားပေးထောက်ခံသွားမှာပါ။ ဒါကိုဗဟိုဌာနချုပ်ကထုတ်ပြန်ပြီးသားပဲ” လို့ ဦးညီရန်းက ပြောကြားခဲ့ကြောင့် စစ်ကောင်စီဝါဒဖြန့်မီဒီတွေမှာ ဖော်ပြထားပါတယ်။
ဒါ့အပြင် မြန်မာနိုင်ငံမှာ နေရာတချို့သာ ငြိမ်းချမ်းတာကို မလိုလားတဲ့ တစ်နိုင်ငံလုံးငြိမ်းချမ်းဖို့ လိုအပ်ကြောင်း ဦးညီရန်းကဆက်ပြောပါတယ်။
စစ်ကောင်စီတပ်ရဲ့ ရွေးကောက်ပွဲကို UWSA က ထောက်ခံကြောင်း ပြောကြားခဲ့ပေမယ့် UWSA ထိန်းချုပ်နယ်မြေတွေကို စစ်ကောင်စီက ရွေးကောက်ပွဲကျင်းပမယ့်ဒေသထဲ ထည့်သွင်းထားတာ မရှိပါဘူး။
NCA လက်မှတ်ရေးထိုးခြင်း ၁၀ နှစ်ပြည့်ကို စစ်ကောင်စီက နေပြည်တော်မှာ ဦးဆောင်ကျင်းပခဲ့ပြီး NCA ရေးထိုးထားတဲ့ တိုင်းရင်းသားလက်နက်ကိုင် ၇ ဖွဲ့အပါအဝင် NCA မထိုးရသေးတဲ့ တိုင်းရင်းသားလက်နက်ကိုင်တချို့လည်း တက်ရောက်ခဲ့ပါတယ်။
ဒါ့အပြင် တရုတ်၊ အိန္ဒိယနဲ့ ထိုင်းနိုင်ငံက ကိုယ်စားလှယ်တွေလည်း တက်ရောက်ခဲ့ပြီး NCA လက်မှတ်ရေးထိုးခြင်း ၁၀ နှစ်ပြည့်ကို တက်ရောက်ခဲ့တဲ့ တရုတ်နိုင်ငံရဲ့ အထူးကိုယ်စားလှယ်တိန်ရှီကျွင်းကတော့ တရုတ်အနေနဲ့ စစ်ကောင်စီရဲ့ ရွေးကောက်ပွဲကို အပြည့်အဝထောက်ခံပြီး နည်းပညာပိုင်းနဲ့ ရုပ်ဝတ္ထုပစ္စည်းကူညီသွားမယ်လို့ ပြောကြားခဲ့ပါတယ်။
ရွေးကောက်ပွဲ ပထမအပိုင်းကို လာမယ့် ဒီဇင်ဘာ ၂၈ ရက်မှာ မြို့နယ်ပေါင်း ၁၀၂ မြို့မှာ စတင်ပြုလုပ်မှာဖြစ်ပြီး အပိုင်း ၃ ပိုင်းနဲ့ ကျင်းပသွားမယ်လို့ စစ်ကောင်စီရဲ့ ရွေးကောက်ပွဲကော်မရှင်က ထုတ်ပြန်ထားပါတယ်။
အမျိုးသားညီညွတ်ရေးအစိုးရ- NUG အပါအဝင် တော်လှန်ရေးအင်အားစုတွေကတော့ စစ်ကောင်စီကျင်းပမယ့် ရွေးကောက်ပွဲကို အသိအမှတ်မပြုကြောင်း ထုတ်ပြောထားပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
