မိုင်းရူပ၊ အောက်တိုဘာ ၁၆ ရက်၊ မိုးမိတ်
တအာင်းတပ်မတော်- PSLF/TNLA ထိန်းချုပ်ထားတဲ့ မိုးမိတ်မြို့ပေါ်ကို စစ်ကောင်စီတပ်က ဂျက်လေယာဥ်နဲ့ ဗုံးထပ်ကြဲခဲ့ရာ အမျိုးသမီးတစ်ဦး ထိခိုက်ဒဏ်ရာ ရခဲ့တယ်လို့ မြေပြင်အခြေအနေ သိရှိသူတချို့က ရွှေဖီမြေကို ပြောပါတယ်။
ဒီနေ့ အောက်တိုဘာ ၁၆ ရက် ည ၆ နာရီ ၂၀ မိနစ်မှာ မိုးမိတ်မြို့ တောင်ပိုင်းရပ်ကွက်ထဲကို စစ်ကောင်စီက ပေါင် ၅၀၀ ဗုံးနဲ့ ပေါင် ၂၅၀ ဗုံးကြဲချတိုက်ခိုက်ခဲ့ ရာ အမျိုးသမီးတစ်ဦး ဗုံးစထိမှန် ဒဏ်ရာရခဲ့ပါတယ်။
” ရဲစခန်းအနီးမှာ လာကြဲတာ။ အမျိုးသမီးတစ် ယောက် နောက်ကျောမှာ ဒဏ်ရာရတာရှိတယ်။ သေဆုံးတာတော့ မရှိဘူး။ အိမ် ၂ လုံး ပျက်စီးသွားတယ်” လို့ မြေပြင်အခြေအနေသိရှိသူတစ်ဦးက ရွှေဖီမြေကို ပြောပါတယ်။
စစ်ကောင်စီတပ်ဟာ ပြီးခဲ့တဲ့ အောက်တိုဘာ ၁ ရက်ကစပြီး တအာင်းတပ် ထိန်းချုပ်ထားတဲ့ သီပေါ၊ နမ္မတူ၊ နမ့်ဆန်၊ မိုးမိတ်၊ မိုးကုတ်နဲ့ မန်တုံမြို့တွေကို လေယာဥ်နဲ့ နေ့စဥ်လိုလို ဗုံးကြဲတိုက်ခိုက်တာတွေ ဆက်တိုက်လုပ်ဆောင်နေပါတယ်။
ပြီးခဲ့တဲ့ အောက်တိုဘာ ၉ ရက်မှာလည်း TNLA ထိန်းချုပ်ထားတဲ့ မိုးမိတ်နယ် ဝဲဘောင်ကျေးရွာကို စစ်ကောင်စီတပ်က ဗုံးကြဲခဲ့ရာ သေဆုံးသူ ကလေးငယ် ၁ ဦးအပါအဝင် အရပ်သား ၈ ဦးသေဆုံးခဲ့ပါတယ်။
၂ ပတ်ကျော်အတွင်း စစ်ကောင်စီရဲ့ ဗုံးကြဲတိုက်ခိုက်မှုကြောင့် ရွှေဖီမြေက ရရှိထားတဲ့စာရင်းအရ TNLA ထိန်းချုပ်ဒေသမှာ သေဆုံးသူ ကလေး (၄) ဦးအပါအဝင် (၃၃) ဦးသေဆုံးခဲ့ပြီး ကလေး (၉) ဦးအပါအဝင် (၄၀) ဦး ထိခိုက်ဒဏ်ရာရခဲ့ပါတယ်။
တအာင်းတပ်ဘက်ကတော့ စစ်ကောင်စီတပ်က ဒရုန်း၊ လက်နက်ကြီးနဲ့ လေကြောင်းအသုံးပြုပြီး အရပ်သားလူထုတွေအပေါ် စစ်ရာဇဝတ်မှုကျူးလွန်နေတာဖြစ်ပြီး လူထုတွေအနေနဲ့ စစ်ရေးသတိရှိကြဖို့ တိုက်တွန်းထားပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
