မိုင်းရူပ၊ အောက်တိုဘာ ၁၅ ရက်၊ သပိတ်ကျင်း
မန္တလေး- မိုးကုတ်လမ်းနဲ့ မိုးကုတ်-သပိတ်ကျင်းလမ်းခွဲ သပိတ်ကျင်းမြို့နယ် ဖောတော့လမ်းဆုံကို စစ်ကောင်စီတပ် ပြန်ရပြီးနောက် တအာင်းတပ်မတော်-PSLF/TNLA ထိန်းချုပ်ထားတဲ့ မိုးကုတ်မြို့ဘက် ထိုးစစ်ဆင် တိုက်ခိုက်လာတယ်လို့ မြေပြင်သတင်းအရင်းအမြစ်တချို့က ရွှေဖီမြေကို ပြောပါတယ်။
မနေ့ အောက်တိုဘာ ၁၄ ရက်မှာ သပိတ်ကျင်းမြို့နယ်ရှိ ဖော့တော့လမ်းဆုံကို စစ်ကောင်စီဘက်က ပြန်ထိန်းချုပ်နိုင်ခဲ့ပြီးနောက် မိုးကုတ်- မန္တလေးလမ်းမအတိုင်း မိုးကုတ်မြို့ဘက်ကို ထိုးစစ်ဆင်လာပြီး ညောင်ပင်သာရွာအနီးကို ရောက်ရှိလာတယ်လို့ ဆိုပါတယ်။
” မနေ့ ဖော့တော့လမ်းဆုံကို စကစ ရသွားတယ်။ အခုက မိုးကုတ်ဘက် ထိုးလာတာ။ ညောင်ပင်သာအနီးတဝိုက်ကို ရောက်နေတယ်။ မနေ့ကတော့ စစ်ရေးတော်တော်ပြင်းထန်နေတယ်။ ဒီနေ့က မိုးရွာနေတာ့ စစ်ရေး နည်းနည်း ငြိမ်နေတယ်” လို့မြေပြင်အခြေအနေသိရှိသူ တစ်ဦးက ရွှေဖီမြေကို ပြောပါတယ်။
စစ်ကောင်စီတပ်ဟာ ဖော့တော့လမ်းဆုံကို ပြန်ရဖို့သပိတ်ကျင်းမြို့နယ် ၇ မိုင်တပ်စခန်းကနေ ထိုးစစ်ဆင်လာပြီး စစ်အင်အားအများအပြားအပါအဝင် အသေခံဒရုန်းတွေကို အဓိကအသုံးပြုတိုက်ခိုက်ခဲ့တယ်လို့ သူကဆက်ပြောပါတယ်။
ဖော့တော့ကျေးရွာဟာ မန္တလေး- မိုးကုတ်သွားလမ်းနဲ့မိုးကုတ်- သပိတ်ကျင်းသွားတဲ့ လမ်းခွဲပေါ်မှာ တည်ရှိပြီး မိုးကုတ်မြို့နဲ့ မိုင် ၅၀ ဝန်းကျငကွာဝေးပါတယ်။
စစ်ကောင်စီတပ်ဟာ ပြီးခဲ့တဲ့ ဇူလိုင်လထဲမှာ သပိတ်ကျင်းမြို့ကို ပြန်ထိန်းချုပ်နိုင်ပြီးနောက် မိုးကုတ်မန္တလေးလမ်းပိုင်းကို ထိုးစစ်ဆင်တိုက်ခိုက်လာတာ ဖြစ်ပါတယ်။
တစ်ဖက်မှာလည်း စစ်ကောင်စီတပ်ဟာ နောင်ချိုကနေ မိုးကုတ်မြို့နယ်ဘက် ထိုးစစ်ဆင်တိုက်ခိုက်နေပြီး မိုးကုတ်- နောင်ချိုလမ်းမပေါ်ရှိ ရတနာသင်္ဂီမိုင်းအနီးစစ်ကောင်စီနဲ့ TNLA အကြား တိုက်ပွဲဆက်ဖြစ်နေပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
