လွေးထွေး၊ အောက်တိုဘာ ၁၅ ရက်၊ မဘိမ်း
ကချင်တပ်မတော် KIA ထိန်းချုပ်ထားတဲ့ ရှမ်းမြောက် မဘိမ်းမြို့က နေအိမ်တစ်ခုမှာ သေနတ်ကိုင်ဆောင်ထားတဲ့ အမျိုးသား ၅ ဦးက ကျပ်ငွေ သိန်း ၂၀၀ တောင်းပြီး မပေးနိုင်ရင် သတ်ပစ်မယ်လို့ ခြိမ်းခြောက်ကြောင်း မိသားစုဝင်နဲ့ နီးစပ်သူတစ်ဦးက ရွှေဖီမြေကို ပြောပါတယ်။
မနေ့ အောက်တိုဘာလ ၁၄ ရက် ညနေ ၅ နာရီဝန်းကျင်မှာ မဘိမ်းမြို့တွင်းက ရပ်ကွက်တစ်ခုမှာ အရပ်သားဝတ်စုံနဲ့ အမျိုးသား ၅ ဦးက သေနတ် အတို၊ အရှည်ကိုယ်စီ ကိုင်ထားပြီး အဲဒီနေအိမ်မှာ ငွေတောင်းခဲ့တာဖြစ်ပါတယ်။
မိသားစုဝင်နဲ့ နီးစပ်သူတစ်ဦးက “သူတို့အခုက ဘေးကင်းတဲ့နေရာ ရောက်ပြီ။ သူတို့ကို သဘက်ခါ ပိုက်ဆံလာယူမယ်လို့ ပြောတယ်။ မပေးနိုင်ရင် တစ်အိမ်လုံးသတ်ပစ်မယ်တဲ့” လို့ ပြောပါတယ်။
နေအိမ်ထဲ ဝင်ရောက်ချိန် ကျပ်ငွေ သိန်း ၂၀၀ ချက်ချင်းပေးဖို့ တောင်းခဲ့တာဖြစ်ပြီး အိမ်ရှင်က ချက်ချင်းမပေးနိုင်ကြောင်း တောင်းပန်ကာ ရက်ချိန်းခဲ့တာဖြစ်တယ်လို့ ဆိုပါတယ်။
လက်နက်ကိုင်ဆောင်တဲ့ အဲဒီအမျိုးသားတွေကို ရှာဖွေ၊ ဖမ်းဆီး၊ အရေးယူပေးဖို့ မိသားစုဝင်တွေက KIA တပ်ဖွဲ့ထံ တိုင်းကြားထားပေမဲ့ လက်ရှိအချိန်အထိ တစုံတရာ ပြန်လည်ပြောဆိုတာ မရှိသေးဘူးလို့ မိသားစုဝင်နဲ့ နီးစပ်သူက ပြောပါတယ်။
မဘိမ်းမြို့ကို ကချင်တပ်မတော် KIA နဲ့ ပူးပေါင်းတပ်တွေက ပြီးခဲ့တဲ့ ၂၀၂၄ ခုနှစ် ဇန်နဝါရီ ၂၁ ရက်မှာ တိုက်ခိုက်သိမ်းပိုက်နိုင်ခဲ့တာဖြစ်ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
