မိုင်းရူပ၊ အောက်တိုဘာ ၁၃ ရက်၊ သီပေါ
တအာင်းတပ်မတော် – PSLF/TNLA ထိန်းချုပ်ထားတဲ့ သီပေါမြို့ကို ထိုးစစ်ဆင်နေတဲ့ စစ်ကောင်စီတပ်ဟာ သီပေါမြို့အနီး ဘော်ကြိုရွာအထိ ရောက်လာတယ်လို့ ရှေ့တန်းစစ်မြေပြင်မှာရှိသူတစ်ဦးက ရွှေဖီမြေကို ပြောပါတယ်။
“အခု စကစတွေ လောင်ခွန်ရွာကို ကျော်လာပြီး ဘော်ကြိုရွာအနီးအထိ ရောက်ပြီ” လို့ ဆိုပါတယ်။
လက်ရှိ တိုက်ပွဲဖြစ်ပွားနေတဲ့ ဘော်ကြိုရွာဟာ သီပေါမြို့နဲ့ ငါးမိုင်ဝန်းကျင်သာ ကွာဝေးပြီး မန်ဟဲနဲ့ နားခဲရွာအပါအဝင်စတဲ့ ကျေးရွာများကို စစ်ကောင်စီတပ် ကျော်ဖြတ်ရအုံးမှာ ဖြစ်ပါတယ်။
သီပေါမြို့ဟာ “၁၀၂၇ စစ်ဆင်ရေး” ဒုတိယလှိုင်းအတွင်း တအာင်းတပ်ဘက်က သိမ်းပိုက်နိုင်ခဲ့တာ ဖြစ်ပြီး၊ သီပေါမြို့ကို စစ်ကောင်စီပြန်ရလာပါက မန္တလေး – သီပေါလမ်းပိုင်းကို ပြန်ထိန်းချုပ်နိုင်မယ့်အခြေအနေ ဖြစ်လာမယ်လို့ ဆိုပါတယ်။
တအာင်းတပ်ဘက်ကတော့ သီပေါမြို့နယ်က တိုက်ပွဲနဲ့ ပတ်သက်ပြီး တစ်စုံတရာ သတင်းထုတ်ပြန်ထားတာ မရှိသေးပါဘူး။
၁ နှစ်ကျော်ကြာ တအာင်းတပ်ထိန်းချုပ်ထားတဲ့ လားရှိုး – မန္တလေးလမ်းအပေါ်ရှိ ကျောက်မဲမြို့ကို စစ်ကောင်စီဘက်က ပြီးခဲ့တဲ့ အောက်တိုဘာ ၁ ရက်မှာ ပြန်ထိန်းချုပ်နိုင်ခဲ့တာ ဖြစ်ပြီး သီပေါမြို့ဘက်ကို ဆက်တိုက် ပြန်ထိုးစစ်ဆင်နေတာ ဖြစ်ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှု နားဆင်နိုင်ပါတယ်။
