မိုင်းရူပ၊ အောက်တိုဘာ ၈ ရက်
ကျောက်မဲမြို့ကို ပြန်ထိန်းချုပ်ပြီးနောက် စစ်ကောင်စီတပ်ဟာ တအာင်းတပ်မတော်–TNLA ထိန်းချုပ်ထားတဲ့ သီပေါမြို့နယ်ဘက်ကို ဆက်လက်ထိုးစစ်ဆင် တိုက်ခိုက်နေတယ်လို့ ရှေ့တန်းစစ်မြေပြင်မှာ ရှိနေသူတွေက ရွှေဖီမြေကို ပြောပါတယ်။
မနေ့ အောက်တိုဘာ ၈ ရက်အထိ စစ်ကောင်စီတပ်ဟာ ကျောက်မဲနဲ့ သီပေါမြို့နယ်ကြားရှိ လွယ်ခေါ်ကျေးရွာမှာ စစ်ကောင်စီနဲ့ TNLA အကြား တိုက်ပွဲပြင်းထန်နေတယ်လို့ ဆိုပါတယ်။
“အခု စစ်ကောင်စီက လွယ်ခေါ်ရွာကို ရောက်နေတာ။ မနေ့ လွယ်ခေါ်ရွာစေတီကုန်းမှာ တိုက်ပွဲပြင်းထန်နေတယ်။ အခုရွာထဲမှာ စစ်ကောင်စီရော TNLA ရော ရှိနေတယ်” လို့ ရှေ့တန်းစစ်မြေပြင်မှာ ရှိနေသူတစ်ဦးက ရွှေဖီမြေကို ပြောပါတယ်။
လွယ်ခေါ်ကျေးရွာဟာ ကျောက်မဲမြို့နယ်ထဲက ကျေးရွာဖြစ်ပြီး စစ်ကောင်စီရဲ့ ထိုးစစ်ကို တအာင်းတပ်ဘက်က အပြင်းအထန် ခုခံနေဆဲဖြစ်တယ်လို့ သူက ဆက်ပြောပါတယ်။
၁ နှစ်ကျော်ကြာ တအာင်းတပ် ထိန်းချုပ်ထားတဲ့ ကျောက်မဲမြို့ကို စစ်ကောင်စီက ပြီးခဲ့တဲ့ အောက်တိုဘာ ၁ ရက်မှာ ပြန်ထိန်းချုပ်နိုင်ခဲ့တာ ဖြစ်ပါတယ်။
တစ်ဖက်မှာလည်း စစ်ကောင်စီတပ်ဟာ တအာင်းတပ် ထိန်းချုပ်ထားတဲ့ မြို့နယ်တွေကို လေကြောင်းနဲ့ ဗုံးကြဲတိုက်ခိုက်တာတွေ ဆက်တိုက် ပြုလုပ်နေပြီး အရပ်သား ထိခိုက်သေဆုံးမှု ၄၀ ကျော်ရှိလာခဲ့ပြီဖြစ်ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှု နားဆင်နိုင်ပါတယ်။
