အိုက်ပွီး၊ အောက်တိုဘာ ၄ ရက်၊ မင်းတပ်
ချင်းပြည်နယ် မင်းတပ်မြို့ကို စစ်ကောင်စီတပ်က လေကြောင်းကနေ ဗုံးကြဲတိုက်ခိုက်ရာ အရပ်သား ၃ ဦး ဒဏ်ရာရရှိပြီး တစ်ဦးက ပြင်းထန်ဒဏ်ရာ ရခဲ့တယ်လို့ ဒေသခံတွေဆီက သိရပါတယ်။
မင်းတပ်မြို့ အရှေ့ပြင်ရပ်ကွက်နဲ့ အနောက်ရပ်ကွက်ကို ဒီနေ့ အောက်တိုဘာ ၄ ရက် မနက် ၁ နာရီခွဲခန့်မှာ လေကြောင်းကနေ တိုက်ခိုက်ခဲ့တာပါ။
“လေယာဉ်က နီးနီးလေး ပျံပြီး ဗုံးကြဲသွားတာပါ။ ရှေ့ပြင်ရပ်ကွက်မှာတစ်ကြိမ်၊ အနောက်ရပ်ကွက် ဟုန်းဟုန်းဟိုတယ်မှာတစ်ကြိမ် ဗုံးကြဲသွားတယ်။ အရပ်သား ၃ ယောက် ဒဏ်ရာ ရတယ်။ တစ်ဦးက ပြင်းထန်ဒဏ်ရာနဲ့ အသက်အန္တရာယ် စိုးရိမ်ရတယ်” လို့ မင်းတပ်ဒေသခံတစ်ဦးက ရွှေဖီမြေသို့ ပြောပါတယ်။
ဒါ့အပြင် လေကြောင်း ဗုံးကြဲတိုက်ခိုက်မှုကြောင့် လူနေအိမ် ၅ လုံးထက်မနည်း ပျက်စီးသွားပြီး အိမ် ၃ လုံးကတော့ လုံးဝ ပျက်စီးသွားတယ်လို့ သိရပါတယ်။
“ပျက်စီးမှုက အနောက်ရပ်ကွက်မှာ များတယ်။ ဟိုတယ်ကို ဗုံးကြဲတာဖြစ်တဲ့အတွက် ပျက်စီးသွားတယ်။ အနီးအနားက လူနေအိမ်တွေလည်း ပျက်စီးသွားတယ်။ အိမ် ၅ လုံးလောက်ရှိမယ်။ အိမ် ၃ လုံးလောက်က လုံးဝ ပျက်စီးသွားပါတယ်” လို့ မင်းတပ်ဒေသခံတစ်ဦးက ရွှေဖီမြေသို့ ပြောပါတယ်။
ပြီးခဲ့တဲ့ စက်တင်ဘာ ၂၁ ရက်ကလည်း မင်းတပ်မြို့ကို လေကြောင်း တိုက်ခိုက်မှု ပြုလုပ်ခဲ့ရာ အရပ်သားနေအိမ် ၇ လုံး ပျက်စီးသွားပါတယ်။
ဒါ့အပြင် စက်တင်ဘာ ၃၀ ရက်ကလည်း ပလက်ဝမြို့ကို ပေါင် ၅၀၀ ဗုံးသီးနဲ့ လေကြောင်းကနေ ဗုံးကြဲတိုက်ခိုက်လို့ အရပ်သား ၂ ဦး သေဆုံးပြီး ကလေးအပါအဝင် ၂၃ ဦး ထိခိုက်ဒဏ်ရာ ရရှိကာ ဆေးရုံအပါအဝင် လူနေအိမ် ၁၀ လုံးထက်မနည်း ပျက်စီးသွားပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
