ပျားကြီး၊ အောက်တိုဘာ ၂ ရက်၊ ကူမဲ
မန္တလေးတိုင်း ကူမဲ၊ မိတ္ထီလာနဲ့ ကျောက်ပန်းတောင်းမြို့နယ်က ကင်းတား၊ မုန်တိုင်နဲ့ ကြက်မောက်တောင်ဆည်မှာ ရေကြီးရေလျှံမှု ဆိုးဆိုးရွားရွား ရှိနေတယ်လို့ ဒေသခံတွေက ရွှေဖီမြေကို ပြောပါတယ်။
အင်္ဂါနေ့ကစပြီး မိုးအဆက်မပြတ် ရွာသွန်းမှုကြောင့် ဆည်တွေရဲ့ သတ်မှတ်ရေလှောင်ပမာဏထက် ကျော်လွန်ပြီး ရေကြီးရေလျှံမှု ရှိလာတာ ဖြစ်ပါတယ်။
“ရေပိုလွှဲတွေကနေ တောက်လျှောက် ဖောက်ချနေတာကို မနိုင်တော့ဘူး။ တချို့ရွာ ရေစဝင်နေပြီ။ လမ်းတွေလည်း သွားလို့မလွယ်တော့ဘူး။ မနှစ်ကလို ဖြစ်မှာစိုးလို့ အခုကတည်းက ဘေးကင်းမယ့်နေရာ ကြိုရွှေ့ထားရတယ်” လို့ ကူမဲဒေသခံတစ်ဦးက ပြောပါတယ်။
လက်ရှိအချိန်မှာ ဆည်အနီးဝန်းကျင်က ကျေးရွာ ၃ ရွာထက်မနည်းမှ ထောင်နဲ့ချီတဲ့ ဒေသခံတွေဟာ ဘေးလွတ်ရာ ကြိုတင်ရွှေ့ပြောင်းနေတာ တွေ့ရပါတယ်။
ဒါ့အပြင် ဆည်တွေ ရေလျှံမှုကြောင့် မိတ္ထီလာ-ကျောက်ပန်းတောင်း ကားလမ်းရဲ့ နေရာတချို့မှာ ရေစီးသန်တဲ့ ရေကျော်နေတာကြောင့် လမ်းပိတ်မှု ရှိလာတယ်လို့ ကျောက်ပန်းတောင်းဒေသခံတွေက ပြောဆိုပါတယ်။
“ဒါမျိုး တခါမှ မဖြစ်ဖူးဘူး။ အခုက မြို့အထွက်မှာကတည်းက ကားလမ်းက ရေပြင်ကြီး ဖြစ်နေပြီ။ တချို့နေရာဆို ဆက်မောင်းလို့ မရလို့ ရပ်နေရတယ်။ ရေက ဆက်တိုးနေတုန်းပဲ” လို့ အသက် ၄၇ နှစ်အရွယ် ကျောက်ပန်းတောင်းမြို့ခံတစ်ဦးက ပြောဆိုပါတယ်။
ဒီလိုရေကြီးရေလျှံမှုကြောင့် မိတ္ထီလာ-ကျောက်ပန်းတောင်း ကားလမ်းပေါ်မှာ ကားအစီးရေ ရာနဲ့ချီပြီး ပိတ်မိနေတယ်လို့ ဒေသခံတွေက ပြောဆိုပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
