ရွှေဖီမြေ၊ ဇန်နဝါရီ ၁၀ ရက်၊ တီးတိန်
ချင်းပြည်နယ် တီးတိန်မြို့ရှိ ရဲတပ်ဖွဲ့ ၂၆ တပ်ရင်းမှ ရဲတပ်သားတစ်ဦး လက်နက်ခဲယမ်းနဲ့အတူ အလင်းဝင်လာတယ်လို့ ချင်းပြည် ကာကွယ်ရေးတပ်ဖွဲ့- CDF CDM SIYIN က ဒီနေ့ ဇန်နဝါရီ ၁၀ ရက်မှာ သတင်းထုတ်ပြန်လာပါတယ်။
မနေ့ ဇန်နဝါရီ ၉ ရက် ညနေပိုင်းမှာ လက်နက်တစ်လက်၊ ခဲယမ်းတချို့နဲ့ အလင်းဝင်လာတာဖြစ်ပြီး ၎င်းကို ကျပ် သိန်း ၁၀၀ ချီးမြှင့်ပေးမယ်လို့ ဆိုပါတယ်။
လက်နက်ခဲယမ်းနဲ့အတူ အလင်းဝင်လာသူတွေကို ကျပ် သိန်း ၁၀၀ ချီးမြှင့်သွားမှာဖြစ်ပြီး စစ်ကောင်စီတပ်ဘက်က အလင်းဝင်ချင်တဲ့ တပ်သားတွေအနေနဲ့ ဆက်သွယ်နိုင်တယ်လို့ CDF CDM SIYIN က ထုတ်ပြန်ထားပါတယ်။
CDF CDM SIYIN ရဲ့ပြောရေးဆိုခွင့်ရှိသူက “ကျနော်တို့ဘက်က ကမ်းလှမ်းတယ်ဆိုတာက သူတို့က ရှုံးနေပြီလေ။ ပေါ်တင် လက်မခံတာပဲ ရှိတယ်။ ဘာပဲဖြစ်ဖြစ် စောစော ကျနော်တို့ဆီ အလင်းလာဝင်တာကမှ သူတို့မှာ တစ်ချောင်းတည်းရှိတဲ့ အသက်အတွက် အာမခံရဖို့ သေချာတာပေါ့” လို့ ဆိုပါတယ်။
ပြီးခဲ့တဲ့ ၂၀၂၄ ခုနစ် ဒီဇင်ဘာ ၁၇ ရက်ကလည်း တီးတိန်မြို့ ခလရ ၂၆၉ တပ်ရင်းမှ ဒုတပ်ကြပ်အပါအဝင် ၂ ဦးနဲ့ မြို့မရဲစခန်းမှ ရဲတပ်ဖွဲ့ဝင် ၂ ဦး စုစုပေါင်း ၄ ဦးဟာ CDF CDM SIYIN ထံ လက်နက်ခဲယမ်းနဲ့အတူ အလင်းဝင်ခဲ့ပါတယ်။
အလင်းဝင်လာလိုတဲ့ စစ်သားတွေကို တီးတိန်မြို့တွင်းမှာဖြစ်စေ၊ ဘယ်နေရာမှာမဆို သွားရောက် ကြိုဆိုပေးမှာဖြစ်ပြီး သွားလိုတဲ့နေရာ၊ လုပ်လိုတဲ့ အလုပ်အကိုင်ကိုလည်း စိတ်တိုင်းကျ စီမံဆောင်ရွက်ပေးမှာဖြစ်ပြီး ကောင်းကောင်းမွန်မွန် စောင့်ရှောက်ထားမှာဖြစ်ကြောင်း ထုတ်ပြန်ချက်မှာ ဖော်ပြထားပါတယ်။
