မိုင်းရူပ၊ စက်တင်ဘာ ၂၅ ရက်၊ သပိတ်ကျင်း
မိုးကုတ်–မန္တလေး လမ်းပိုင်းကို ထိန်းချုပ်ဖို့ ထိုးစစ်ဆင် တိုက်ခိုက်နေတဲ့ စစ်ကောင်စီတပ်ဟာ မိုးကုတ်–မန္တလေး လမ်းမကြီးအနီးရှိ လမ်းလယ်ကျစ်ရွာကို ပြန်ထိန်းချုပ်ခဲ့ပြီး တိုက်ပွဲ ဆက်ပြင်းထန်နေတယ်လို့ သိရပါတယ်။
ပြီးခဲ့တဲ့ စက်တင်ဘာ ၂၃ ရက်မှာ တော်လှန်ရေးတပ်တွေ ထိန်းချုပ်ထားတဲ့ လမ်းလယ်ကျစ်ရွာကို စစ်ကောင်စီတပ်ဘက်က ပြန်ထိန်းချုပ်နိုင်ခဲ့ပြီး၊ ထို့နောက် လမ်းလယ်ကျစ်ရွာကို တော်လှန်ရေးဘက်က ပြန်လည်ထိုးစစ်ဆင်တာတွေ ပြုလုပ်နေတဲ့အတွက် တိုက်ပွဲ ဆက်လက်ပြင်းထန်နေတယ်လို့ မြေပြင်သတင်းအရင်းမြစ် တစ်ဦးက ရွှေဖီမြေကို ပြောပါတယ်။
“လမ်းလယ်ကျစ်ကို စကဘက်က ပြန်ရသွားတော့ ဟုတ်တယ်။ ဒီဘက်ကလည်း ပြန်လည်ထိုးစစ်ဆင်နေတာ ရှိတယ်” လို့ ဆိုပါတယ်။
လမ်းလယ်ကျစ်ကျေးရွာဟာ မိုးကုတ်–မန္တလေး လမ်းမပေါ်ရှိ သပိတ်ကျင်းမြို့နယ် ဇရပ်ကွင်းကျေးရွာအနီးမှာ တည်ရှိပြီး လက်ရှိအချိန်အထိ မိုးကုတ်–မန္တလေး လမ်းမကြီးကို တော်လှန်ရေးတပ်တွေဘက်က ဆက်လက်ထိန်းချုပ်ထားဆဲ ဖြစ်တယ်လို့ သူက ဆက်ပြောပါတယ်။
စစ်ကောင်စီတပ်ထောက်ခံတဲ့ တယ်လီဂရမ်ချန်နယ်တွေမှာလည်း လမ်းလယ်ကျစ်ကျေးရွာကို စစ်ကောင်စီတပ်ဘက်က ပြန်လည်ထိန်းချုပ်နိုင်တဲ့ ဓာတ်ပုံတွေ ရေသားဖော်ပြနေကြပါတယ်။
စစ်ကောင်စီဘက်က မိုးကုတ်–မန္တလေး လမ်းကို ပြန်ထိန်းချုပ်ဖို့ အင်အားအများအပြား အသုံးပြုပြီး ထိုးစစ်ဆင်တိုက်ခိုက်နေသလို၊ လေကြောင်းနဲ့ လက်နက်ကြီးတွေကိုလည်း နေ့စဉ်လိုလို ပစ်ခတ်တိုက်ခိုက်နေပါတယ်။
စစ်ကောင်စီတပ်ထိုးစစ်ကြောင့် ဇရပ်ကွင်းကျေးရွာခံအပါအဝင် ရွှေမွှေးချောင်း၊ ၄ မိုင်၊ ၆ မိုင်၊ နဲ့ ရေပူလယ်တီစတဲ့ ကျေးရွာတွေက ဒေသခံ ၅ ထောင်ကျော် ဘေးလွှတ်ရာကို ထွက်ပြေးတိမ်းရှောင်နေကြရပါတယ်။
သပိတ်ကျင်းမြို့နယ်မှာ တအာင်းတပ်မတော်–TNLA အပါအဝင် မိုးကုတ်ဗျူဟာ၊ မန္တလေး PDF နဲ့ အမျိုးသားညီညွတ်ရေးအစိုးရ–NUG လက်အောက်ခံတပ်တွေက စစ်ကောင်စီကို တိုက်ခိုက်နေတာ ဖြစ်ပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှု နားဆင်နိုင်ပါတယ်။
