ပို့လဘား၊ စက်တင်ဘာ ၂၃ ရက်၊ ကွတ်ခိုင်
တအာင်းတပ်- PSLF/TNLA ထိန်းချုပ်ထားတဲ့ ကွတ်ခိုင်မြို့ထဲက KTV တွေကို တစ်ပတ်ကြာ ပိတ်ထားပြီးနောက် ပြန်ဖွင့်နေသလို ဖွင့်လှစ်လိုက်တဲ့ KTV တွေကို ကိုးကန့်တပ်- MNDAA ဘက်က လုံခြုံရေး စောင့်ပေးနေတယ်လို့ ရွှေဖီမြေက စုံစမ်းသိရှိရပါတယ်။
ကွတ်ခိုင်မြို့ပေါ်မှာရှိတဲ့ KTV တွေကို တအာင်းတပ်ရဲ့ ရဲတပ်ဖွဲ့ဘက်က ပိတ်ပင်ဖို့ ကြေညာပြီးနောက် တချို့ KTV ဟာ တစ်ပတ်ကြာ ပိတ်ခဲ့ပြီး ပြန်လည် ဖွင့်လှစ်တာ ရှိတယ်လို့ ဒေသခံ အမျိုးသားတစ်ဦးက ပြောပါတယ်။
“ပိတ်တာတော့ ဟုတ်တယ်။ တစ်ပတ်ပိတ်ထားပြီး အခုပြန်ဖွင့်နေပြီ။ 8888 နဲ့ ရင်ချန်းဆိုင် မပိတ်ဘူး။ ကိုးကန့်တပ်က အစောင့်လုပ်ပေးတယ်။ တအာင်းလူငယ်တွေဆို သူတို့ပေးမဝင်ဘူး။ ဘာလို့လဲဆိုတော့ ငါတို့ဘက်က ပိတ်ခိုင်းတာဖြစ်ပြီး ငါတို့သွားဝင်ရင် သတင်းကြီးသွားမှာ ကြောက်လို့ ပေးမဝင်တာ”
ပြီးခဲ့တဲ့ စက်တင်ဘာ ၃ ရက်ကစပြီး KTV ဆိုင်တွေ ပိတ်ထားဖို့ တအာင်းတပ်ဘက်က တရားဝင် အသိပေးထားတာဖြစ်ပြီး ဆိုင်ပိတ်ထားဖို့ ကြေညာထားတဲ့ကာလအတွင်း စည်းကမ်း ချိုးဖောက်ပြီး ဆိုင်ဖွင့်တာ ရှိခဲ့ရင် ပြင်းပြင်းထန်ထန် အရေးယူမယ်လို့ ပြောဆိုထားပါတယ်။
ဒါ့အပြင် မိုးကုတ်မြို့ပေါ်ရှိ KTV နဲ့ အနှိပ်ခန်းဆိုင်တွေကိုလည်း တအာင်းတပ်ရဲ့ ရဲတပ်ဖွဲ့ဘက်က ပြီးခဲ့တဲ့ စက်တင်ဘာ ၁၃ ရက်ကစပြီး ပိတ်ပင်ဖို့ လိုက်လံ သတိပေးခဲ့ပါတယ်။
တအာင်းတပ် ထိန်းချုပ်ထားတဲ့ တခြားမြို့နယ်တွေဖြစ်တဲ့ ကျောက်မဲ၊ နမ္မတူနဲ့ နမ့်ခမ်းမြို့မှာရှိတဲ့ KTV ဆိုင်တွေကိုလည်း ပိတ်ထားကြပြီ ဖြစ်ပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှု နားဆင်နိုင်ပါတယ်။
