ရွှေဖီမြေ၊ စက်တင်ဘာ ၂၃ ရက်၊ ကန့်ဘလူ
စစ်ကိုင်းတိုင်း ကန့်ဘလူမြို့နယ် ကျီစုကျေးရွာထဲ စစ်ကောင်စီတပ်က ဂျက်ဖိုက်တာနဲ့ ပေါင် ၅၀၀ ဗုံး ၂ လုံး အကြောင်းမဲ့ လာရောက် ကြဲချမှုကြောင့် ဒေသခံတစ်ဦး သေဆုံးပြီး ၁၇ ဦး ထိခိုက်ဒဏ်ရာ ရခဲ့တယ်လို့ ကျွန်းလှ တက်ကြွလှုပ်ရှားသူများအဖွဲ့က မနေ့ စက်တင်ဘာ ၂၂ ရက်မှာ ထုတ်ပြန်ထားပါတယ်။
မနေ့မနက် ၁ နာရီခွဲဝန်းကျင်မှာ စစ်တပ်က ပေါင် ၅၀၀ ဗုံးသီးနှစ်လုံးနဲ့ နှစ်ကြိမ် လာရောက် ကြဲချတိုက်ခိုက်ခဲ့တာလို့ ဆိုပါတယ်။
ပစ်ချခဲ့တဲ့ ပေါင် ၅၀၀ ဗုံးကြောင့် ကျီစုရွာက အသက် ၅၅ နှစ်အရွယ် ဒေါ်သန်းအေး သေဆုံးခဲ့ပြီး ဒေသခံ ၁၇ ဦး ထိခိုက်ဒဏ်ရာ ရခဲ့တဲ့အပြင် နေအိမ်နှစ်လုံးနဲ့ စာသင်ကျောင်းဆောင်တွေလည်း ပျက်စီးခဲ့တယ်လို့ ဖော်ပြထားပါတယ်။
“ဖိုက်တာ ပစ်တဲ့အချိန်က တကယ့်အိပ်မောကျနေတဲ့အချိန်ကြီးဗျ။ ပထမတစ်လုံး ချတာက မနက် ၁ နာရီ ၂၅ မိနစ် နောက်တစ်လုံးက ၁ နာရီ ၂၈ မိနစ် ကံကောင်းတာက ပထမတစ်လုံးကျတာ လူသိပ်မရှိတဲ့ စာသင်ကျောင်းနဲ့ ဘုန်းကြီးကျောင်း(မြောက်)ကြား နောက်တစ်လုံးက ဘုန်းကြီးကျောင်း(တောင်)နဲ့ လူနေအိမ်ကြား ကျတာမို့ သေဆုံး နည်းတာဗျ။ ဟိုလိုဆို မလွယ်လောက်ဘူး။ ဒေါ်သန်းအေးကတော့ ကံဆိုးသွားတာပေါ့ဗျာ။ ရွာထဲမှာ ဘာအဖွဲ့အစည်းမှ မရှိတော့ ဘယ်သူက ဖိုက်တာ ပစ်မယ်ထင်မှာလဲ။ စစ်ကောင်စီကတော့ ကုလားမနိုင် ရခိုင်မည်းဆိုသလို အကြမ်းဖက်ပဒတ်ရှိတယ် ခေါင်းစဉ်တပ်ပြီး ပြည်သူတွေရှိတဲ့ ရွာတွေပဲ ပတ်ကြဲနေတာ ထုံးစံကြီးကို ဖြစ်လို့နေပါပြီ” လို့ ဒေသခံတစ်ဦးရဲ့ ပြောပြချက်ကို ကိုးကားပြီးလည်း ရေးသားဖော်ပြထားပါတယ်။
ဒဏ်ရာရတဲ့ ၁၇ ဦးထဲ ၅ ဦးက အသက်အန္တရာယ် စိုးရိမ်ရပြီး ၇ ဦးက တခြားရွာကနေ စစ်ရှောင်လာတဲ့ ဒေသခံတွေ ဖြစ်တယ်လို့ ထုတ်ပြန်ချက်မှာ ဖော်ပြထားပါတယ်။
ကျီစုရွာမှာ အိမ်ခြေ စုစုပေါင်း ၈၇၀ အိမ်ရှိပြီး ၂၀၂၂ ခုနှစ် ဇူလိုင်နဲ့ နိုဝင်ဘာလအတွင်း စစ်တပ်ရဲ့ နှစ်ကြိမ်ဆက်တိုက် မီးရှို့ဖျက်ဆီးမှု ခံရတာကြောင့် အိမ်ခြေ ၇၀၀ ခန့် မီးလောင်ပျက်စီးပြီး တစ်ရွာလုံးနီးပါး တစ်နှစ်ကျော် အိုးမဲ့အိမ်မဲ့ ဖြစ်ခဲ့တဲ့ရွာလည်း ဖြစ်ပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
