အိုက်ပွီး၊ စက်တင်ဘာ ၂၂ ရက်၊ မင်းတပ်
ချင်းပြည်နယ်၊ မင်းတပ်မြို့၊ စံပြရပ်ကွက်မှာ စစ်ကောင်စီတပ်က လေကြောင်းဗုံးကြဲတိုက်ခိုက်လို့ လူနေအိမ် ၇ လုံး ထိခိုက်ပျက်စီးသွားတယ်လို့ ဒေသခံတွေဆီက သိရပါတယ်။
မင်းတပ်မြို့၊ စံပြရပ်ကွက်ကို မနေ့ စက်တင်ဘာ ၂၁ ရက်နေ့၊ ည ၉ နာရီခွဲဝန်းကျင်မှာ စစ်ကောင်စီတပ်က ဂျက်ဖိုက်တာနှစ်စီးနဲ့ ဗုံးသီး ၄ လုံး ကြဲချတိုက်ခိုက်ခဲ့တာပါ။
“ညကဗုံးကြဲတဲ့နေရာမှာ လူနေထိုင်တာမရှိတော့ ထိခိုက်မှုမရှိဘူး။ စစ်ရေးလှုပ်ရှားတာ မရှိဘဲ ပုံမှန်အခြေအနေမျိုးမှာ လေကြောင်း တိုက်ခိုက်တာပါ။ နေအိမ်ကတော့ ၇ လုံး လုံးဝ ပျက်စီးသွားပါတယ်။” လို့ မင်းတပ်မြို့နယ်ဒေသခံတစ်ဦးက ရွှေဖီမြေကို ပြောပါတယ်။
မင်းတပ်မြို့နယ်မှာ အရင်က စစ်ကောင်စီတပ် လေကြောင်း တိုက်ခိုက်မှု မကြာခဏ ပြုလုပ်ပေမယ့် မနေ့ည လေကြောင်း ဗုံးကြဲ တိုက်ခိုက်မှုဟာ စက်တင်ဘာလမှာ ပထမဆုံးအကြိမ် လေကြောင်း ဗုံးကြဲ တိုက်ခိုက်မှုဖြစ်ပါတယ်။
“အရင်အပတ်တွေက မင်းတပ်မြို့ပေါ်မှာ လေယာဥ်တွေ အမြဲ ပျံဝဲတယ်။ လေကြောင်း တိုက်ခိုက်မှု မရှိသေးဘူး။ မနေ့ညက လေကြောင်း တိုက်ခိုက်မှုက ဒိီလမှာ ပထမဆုံးပါ။ မင်းတပ်မှာ လေကြောင်းတိုက်ခိုက်မှု မရှိတာ တစ်လလောက်ရှိပြီ။”လို့ မင်းတပ်မြို့နယ်ဒေသခံတစ်ဦးက ရွှေဖီမြေသို့ ပြောပါတယ်။
ပြီးခဲ့တဲ့ စက်တင်ဘာလ ၁၀ ရက်နေ့ကလည်း မင်းတပ်မြို့နယ်အစပ် ကန်ပက်လက်မြို့နယ်ထဲက ခါပန်းရွာကို စစ်ကောင်စီက ပေါင် ၅၀၀ နဲ့ ဗုံးကြဲတိုက်ခိုက်ခဲ့ပါတယ်။
မင်းတပ်မြို့နယ်ကို ချင်းညီနောင်(CB)နဲ့ မဟာမိတ်ပူးပေါင်းတပ်တို့က ပြီးခဲ့တဲ့ ၂၀၂၄ ခုနှစ်၊ ဒီဇင်ဘာလမှာ တိုက်ခိုက်သိမ်းပိုက်ရရှိထားပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှု နားဆင်နိုင်ပါတယ်။
