ရွှေဖီမြေ၊ ဇန်နဝါရီ ၁၀ ရက်
ဖိအားအမျိုးမျိုးကြားကနေ ရုန်းကန်နိုးထကြရတဲ့ တော်လှန်ရေး အင်အားစုတွေဟာ နိုင်ငံတဝန်းက ဒေသအသီးသီးမှာ ဘုံရန်သူဖြစ်တဲ့ စစ်ကောင်စီကို တော်လှန်တိုက်ခိုက်နေပြီး စစ်တပ်ဟာလည်း သမိုင်းတွင်တဲ့ ရှုံးနိမ့်မှု ဆက်တိုက် ကြုံနေရတယ်လို့ တအာင်းတပ်- TNLA က ပြောပါတယ်။
ဒီနေ့ ဇန်နဝါရီ ၁၀ ရက်မှာ PSLF/TNLA ရဲ့ နှစ်ပတ်လည် အစည်းအဝေးအပြီး ထုတ်ပြန်ချက်ကို ထုတ်ပြန်ရာ အခုလို ဖော်ပြထားတာ ဖြစ်ပါတယ်။
လက်ရှိအချိန်ဟာ တိုင်းရင်းသားလက်နက်ကိုင်တပ်နဲ့ နွေဦးတော်လှန်ရေးအင်အားစု စုပေါင်းပြီး တော်လှန်ရေးအရှိန်ကို အမြင့်ဆုံးလွှင့်ကာ အောင်ပွဲရယူဖို့ အချိန်အခါကောင်း ဖြစ်တယ်လို့ နှစ်ပတ်လည် အစည်းအဝေးမှာ ရှုမြင်ကြောင်း ပြောဆိုထားပါတယ်။
TNLA အနေနဲ့ ၁၀၂၇ စစ်ဆင်ရေးအတွင်း ထိန်းချုပ်ထားတဲ့ မြို့တွေကို လုံခြုံရေး၊ တရားဥပဒေ စိုးမိုးရေး၊ ပညာရေး၊ ကျန်းမာရေးနဲ့ လူမှုဘဝ ဖွံ့ဖြိုးတိုးတက်ရေးကို ဦးဆောင်အုပ်ချုပ်သွားမှာဖြစ်ပြီး လူထုတွေ ပါဝင်နိုင်တဲ့ လူထုအစိုးရ ပေါ်ပေါက်ဖို့ ကြိုးစားသွားမယ်လို့ ပြောပါတယ်။
နှစ်ပတ်လည် အစည်းအဝေးမှာ TNLA ကို တပ်မဟာ ၉ ခုအထိ ပြောင်းလဲဖွဲ့စည်းခဲ့ပြီး မြို့ ၁၈ မြို့ ပါဝင်တဲ့ ခရိုင် ၅ ခုကိုလည်း ပြင်ဆင်စုဖွဲ့ဖို့ သဘောတူခဲ့ကြပါတယ်။
အရှိန်ပြင်းတဲ့ တော်လှန်ရေးကာလအတွင်း အသက်၊ နေအိမ်နဲ့ လုပ်ငန်းတွေ စွန့်လွှတ်ခဲ့ကြတဲ့ လူထု၊ တအာင်းတပ်ဖွဲ့ဝင်ကို ပြည်လည် ထူထောင်ရေး၊ လုံခြုံအေးချမ်းတဲ့ လူ့အဖွဲ့အစည်း တည်ဆောက်နိုင်ဖို့ တအာင်းပြည်အတွင်းမှာရှိတဲ့ လူထုနဲ့ ပူးပေါင်းသွားမယ်လို့လည်း ဆိုပါတယ်။
PSLF/TNLA ရဲ့ နှစ်ပတ်လည် အစည်းအဝေးကို ယာယီဌာနချုပ်မှာ ဇန်နဝါရီ ၃ ရက်ကနေ ၇ ရက်အထိ ၅ ရက်ကြာ ပြုလုပ်ခဲ့ပြီး ဗဟိုကော်မတီဝင်အပါအဝင် ၁၇၃ ဦး တက်ရောက်ခဲ့ပါတယ်။
TNLA ဟာ ၁၀၂၇ စစ်ဆင်ရေးအတွင်း နမ့်ဆန်၊ မန်တုံ၊ နမ္မတူ၊ နမ့်ခမ်း၊ ကွတ်ခိုင်၊ ကျောက်မဲ၊ မိုင်းလုံ၊ မိုင်းငေါ့၊ မိုးမိတ်၊ မိုးကုတ်၊ သီပေါနဲ့ နောင်ချို စတဲ့မြို့တွေကို တိုက်ခိုက်သိမ်းပိုက်ပြီး အုပ်ချုပ်နေတာလည်း ဖြစ်ပါတယ်။
