ရွှေဖီမြေ၊ စက်တင်ဘာ ၁၉ ရက်
ပြည်သူ့ကာကွယ်ရေးတပ်မတော် (မန္တလေး) ရဲ့ အပတ်စဉ် ၁၇ အခြေခံ စစ်သင်တန်း ဆင်းပွဲကိုကျင်းပပြုလုပ်ခဲ့ကြောင်း မန္တလေး PDF က သတင်းထုတ်ပြန်ပါတယ်။
သင်တန်းဆင်းပွဲကို လွတ်မြောက်နယ်မြေ တစ်နေရာမှာ ကျင်းပပြုလုပ်ခဲ့ပြီး အခြေခံ စစ်ပညာ၊စစ်နည်းဗျူဟာရေးဆွဲခြင်း၊ စစ်သည်တော်ကျင့်ဝတ်နဲ့ စည်းကမ်း၊ နိုင်ငံရေး အသိပညာနဲ့ ကိုယ်ကာယကြံ့ခိုင်မှုဆိုင်ရာ သင်ခန်းစာများကို သင်ကြားပေးခဲ့တယ်လို့ ဆိုပါတယ်။
မန္တလေး PDF အနေနဲ့ အာဏာရှင်စနစ် အမြစ်ပြတ် ချေမှုန်းရေးနဲ့ ဖက်ဒရယ် ဒီမိုကရေစီနိုင်ငံတော်တည်ဆောက်ရေး တာဝန်တွေကို ဆက်လက်ထမ်းဆောင်နေတယ်လို့ ထုတ်ပြန်ချက်ထဲ ဖော်ပြထားပါတယ်။
မန္တလေး PDF ရဲ့ သင်တန်းဆင်းပွဲကို ဗမာပြည်သူ့ လွတ်မြောက်ရေးတပ်တော် (BPLA) နိုင်ငံရေးမှူး၊ မိုးကုတ်ဗျူဟာနဲ့ ဗျူဟာ အမှတ် (၉၃) (TRI ဗျူဟာ) စတဲ့ မဟာမိတ် တော်လှန်ရေးတပ်တွေ တက်ရောက်ခဲ့ကြပါတယ်။
မန္တလေး PDF ဟာ စဉ့်ကူးမြို့ကို ထိန်းချုပ်ထားပြီး သပိတ်ကျင်း၊ မတ္တရာနဲ့ ပုသိမ်ကြီး မြို့နယ်တွေမှာအခြေချ လှုပ်ရှားပြီး စစ်ကောင်စီကို တိုက်ခိုက်နေတဲ့ အင်အား ထောင်ချီရှိတဲ့ တော်လှန်ရေးတပ်တစ်ခု ဖြစ်ပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှု နားဆင်နိုင်ပါတယ်။
