ယာရူစိင်၊ စက်တင်ဘာ ၁၇ ရက်၊ ဖားကန့်
ကချင်ပြည် ဖားကန့်မြို့နယ် အထက်မှော်ရှန်ရွာအနီးမှာ စစ်ကောက်စီတပ်က ပစ်ခတ်လိုက်တဲ့ လက်နက်ကြီးကြောင့် ကလေးငယ် ၁ ဦးသေဆုံးပြီး ၄ ဦးထိမှန်ဒဏ်ရာရရှိခဲ့တယ်လို့ ဒေသခံ အမျိုးသမီးတစ်ဦးက ရွှေဖီမြေကို ပြောပါတယ်။
ဒီနေ့ စက်တင်ဘာ ၁၇ ရက် ညနေ ၄ နာရီဝန်းကျင်မှာ ဖားကန့်မြို့နယ် ဆိုင်းတောင် အထက်မှော်ရှန်ရွာအနီးမှာ စစ်တပ်က ရမ်းသမ်းပစ်ခတ်တဲ့ လက်နက်ကြီးကျရောက်ပေါက်ကွဲခဲ့တာ ဖြစ်ပါတယ်။
“ ဒဏ်ရာရတာကလည်း ကလေးတွေလည်း ပါဝင်တယ်။ ၂ ဦးတော့ ဒဏ်ရာပြင်းထန်နေပါတယ်။ ကလေး ၁ ဦးတော့ ပွဲချင်းပြီးသေဆုံးတာပါ။ တောင်ကြားလမ်းဘက်မှာ လက်နက်ကြီးကျတာ။ ကလေးတွေ ကစားနေကြတဲ့ အချိန်မှာ လက်နက်ကြီးကျတာပါ”လို့ ဒေသခံ အမျိုးသမီးတစ်ဦးက ပြောပါတယ်။
စစ်တပ်က ပစ်ခတ်တဲ့လက်နက်ကြီးကြောင့် အသက် ၉ နှစ်အရွယ်သာရှိတဲ့ မမေမြတ်နိုးသွယ် သေဆုံးခဲ့ရတာ ဖြစ်ပါတယ်။
ပြီးခဲ့တဲ့ စက်တင်ဘာ ၁၅ ရက် နေ့လယ် ၃ နာရီကျော်မှာလည်း မရှီကထောင်ကျေးရွာဘက်မှာ စစ်ကောင်စီတပ်က ပစ်ခတ်တဲ့ လက်နက်ကြီးကြောင့် ဒေသခံ ၁ ဦးဒဏ်ရာရရှိခဲ့ပါတယ်။
အလားတူ ပြီးခဲ့တဲ့ စက်တင်ဘာ ၉ ရက်ကလည်း ဖားကန့်မြို့ ဆိပ်မူကျေးရွာဘက်ကို စစ်ကောင်စီတပ်က လက်နက်ကြီး ပစ်ခတ်လိုက်လို့ ဒေသခံတစ်ဦး သေဆုံးပြီး ၁၀ ဦးထိခိုက်ဒဏ်ရာရရှိခဲ့ပါတယ်။
လက်ရှိ ဖားကန့်မှာ စစ်ကောင်စီတပ်နဲ့KIAတပ်တို့အကြား စစ်ရေးတင်းမာနေဆဲ ဖြစ်ပြီး စစ်ကောင်စီဘက်က လက်နက်ကြီးတွေ မကြာခဏဆိုသလို ပစ်ခတ်တိုက်ခိုက်လေ့ရှိနေပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
