ရဲမာန်၊ စက်တင်ဘာ ၁၇ ရက်၊ မုံရွာ
စစ်ကိုင်းတိုင်းရဲ့ မြို့တော်ဖြစ်တဲ့ မုံရွာမြို့မှာ စစ်ကောင်စီတပ်က အလုပ်သွားအလုပ်ပြန် ပြည်သူတွေကို ဖမ်းဆီးပေါ်တာဆွဲနေတာတွေ ပြုလုပ်နေတယ်လို့ Monywa Road Information- MRI ရဲ့ တာဝန်ရှိသူတစ်ဦးက ရွှေဖီမြေကိုပြောပါတယ်။
စစ်ကောင်စီတပ်ဟာ နေရာအတိကျဖမ်းဆီးတာမျိုးမဟုတ်ဘဲ လမ်းသွားလမ်းလာတွေကို ကြုံရင်ကြုံသလို လိုက်လံဖမ်းဆီးနေတယ်လို့ ၎င်းက ဆိုပါတယ်။
“နေရာအတိအကျတော့ ကားရပ်ပြီး ဆွဲတာမျိုး မဟုတ်ဘူး။ ကားနဲ့ ပတ်တယ် ပတ်ရင်း ရပ်ပီး ဆွဲတာမျိုးတာ ပြုလုပ်နေတာ။ အခုအခြေနေက အလုပ်သွားအလုပ်ပြန် အချိန်တွေမှာလဲ ဆွဲတာမျိုးတွေပြုလုပ်နေတယ်”
စစ်ကောင်စီတပ်ရဲ့ မကြာခဏပေါ်တာဆွဲနေတာကြောင့် ပြည်သူတွေအနေနဲ့ ဂရုစိုက်သွားလာနေထိုင်ဖို့ ၎င်းက ဆက်ပြောပါတယ်။
“ပြည်သူတွေအနေနဲ့လဲ အသွားအလာ သတိထားသွားနေရမဲ့ အခြေနေပါ။ ကိုယ့်အိမ်ထဲမှာနေရင်တောင် မလုံခြုံတဲ့ အခြေအနေမျိုးပါ။ ဆွဲလိုက် နားလိုက် လုပ်နေတာ။ ပြည်သူတွေ သတိပေါ့သွားရင် ပြန်ပီး ဆွဲလိုက် အဲ့လိုမျိုးပါ”
စစ်ကောင်စီတပ် ထိန်းချုပ်ထားတဲ့ မန္တလေးမြို့ပေါ်က ရပ်ကွက်တွေမှာလည်း စစ်မှုထမ်းအပတ်စဉ် ၁၇ အတွက် လူငယ်လူရွယ်တွေကို ဖိအားပေး မဲနှိုက်ခိုင်းတာတွေ အခုရက်ပိုင်း ရှိလာတယ်လို့ သိရပါတယ်။
မနေ့ စက်တင်ဘာ ၁၆ရက်နေ့မှာလည်း စစ်ကိုင်းမြို့ထဲက လက်ဖက်ရည်ဆိုင်တစ်ခုမှာ အမျိုးသမီး ၃ဦးအပါအဝင် လူငယ်အမျိုးသား ၃၀ထက်မနည်းကို စစ်ကောင်စီက ဝင်ရောက်ဖမ်းဆီးခေါ်ဆောင်သွားခဲ့တယ်လို့ ဒေသခံတွေက ပြောပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
