မြတ်နိုး၊ ဇန်နဝါရီ ၉ ရက်၊ ဖားကန့်
ကချင်ပြည်နယ် ဗန်းမော်ခရိုင် မံစီမြို့ အခြေစိုက် စစ်ကောင်စီ တပ်စခန်း ၃ ခုကို တစ်ချိန်တည်း လက်လွှတ်ဆုံးရှုံးခဲ့ရတဲ့ မနေ့ ဇန်နဝါရီ ၈ ရက် ညမှာ စစ်တပ်က တိုက်ပွဲဖြစ်ပွားခြင်းမရှိတဲ့ ဖားကန့်မြို့နယ် ဘွမ်နန်ရွာကို လေယာဉ်နဲ့ ဗုံးကြဲတိုက်ခိုက်လို့ အရပ်သားတစ်ဦး သေဆုံးပြီး ၂ ဦး ဒဏ်ရာ ရခဲ့ကြောင်း ဒေသခံတွေဆီက သိရပါတယ်။
“ညက လေယာဉ်နဲ့ ဗုံး ၂ ကြိမ် လာကြဲသွားတာ ဟုတ်တယ်။ အသက် ၄၀ ဝန်းကျင် အမျိုးသမီးတစ်ယောက် သေဆုံးသွားတယ်။ အမျိုးသမီး နှစ်ယောက်လည်း ဒဏ်ရာ ရတယ်” လို့ ဒေသခံ အမျိုးသားတစ်ဦးက ပြောပါတယ်။
ဗုံးဟာ ဈေးဆိုင်တန်းငယ်တွေရှိတဲ့အနီး ကျရောက်ပေါက်ကွဲခဲ့တာကြောင့် ဆိုင်ထဲက အမျိုးသမီးတွေ ထိခိုက်သေဆုံးသွားတာဖြစ်ပြီး ဆိုင် ၃ ဆိုင်လည်း ထိခိုက်ပျက်စီးသွားတယ်လို့ ဆိုပါတယ်။
“မနေ့ည ၁၀ နာရီ မိနစ် ၅၀ လောက်က လာကြဲတာပါ။ ၂ ကြိမ်ပါ။ အရင်က KIA တပ်မဟာ ၉၊ တပ်ရင်း ၆ ရဲ့ စခန်း အဟောင်းနားလေ” လို့ KIA နဲ့ နီးစပ်သူတစ်ဦးက ပြောပါတယ်။
စစ်တပ်ဟာ တပ်စခန်းတွေ လက်လွှတ်ဆုံးရှုံးရပြီဆိုရင် အခုလို စစ်နဲ့မဆိုင်တဲ့နေရာ၊ စစ်ရှုံးခဲ့တဲ့နေရာ၊ တိုက်ပွဲ ဖြစ်ပွားခြင်း မရှိတော့တဲ့နေရာကို လေကြောင်းကနေ ဗုံးကြဲတိုက်ခိုက်လေ့ ရှိတာကြောင့် ဒေသခံတွေအနေနဲ့ သတိလက်လွှတ်မနေသင့်ဘူးလို့ ၎င်းက ဆက်ပြောပါတယ်။
မနေ့ ဇန်နဝါရီ ၈ ရက် နေ့လယ် ၁ နာရီဝန်းကျင်မှာလည်း တိုက်ပွဲ ဖြစ်ပွားခြင်းမရှိဘဲ TNLA ထိန်းချုပ်ထားတဲ့ မိုးကုတ်မြို့ ဂေါက်ကွင်းနဲ့ မစိုးရိမ်ကျောင်းတိုက်ဘက်မှာ Y-12 လေယာဥ်နဲ့ ဗုံးအလုံး ၂၀ ခန့် ကြဲချတိုက်ခိုက်ခဲ့လို့ နေအိမ် ၅ လုံး၊ ဘုန်းကြီးကျောင်းနဲ့ မော်တော်ယာဥ် ၁ စီး ထိခိုက်ပျက်စီးသွားခဲ့ပါတယ်။
