မိုင်းရူပ၊ ဇန်နဝါရီ ၉ ရက်၊ ရမ်းဗြဲ
အာရက္ခတပ်တော်- AA ထိန်းချုပ်ထားတဲ့ ရခိုင်ပြည်နယ် ရမ်းဗြဲမြို့နယ် ကျော်နီမော်ရွာက လူအစုလိုက် အပြုံလိုက် သေဆုံးစေခဲ့တဲ့ စစ်ကောင်စီတပ်ရဲ့ လေကြောင်းတိုက်ခိုက်မှုဟာ စစ်ရာဇဝတ်မှုကို ပြောင်ပြောင်တင်းတင်း ကျူးလွန်နေတာဖြစ်တယ်လို့ AA ရဲ့ ပြောခွင့်ရသူ ဦးခိုင်သုခက ရွှေဖီမြေကို ပြောပါတယ်။
မနေ့ ဇန်နဝါရီ ၈ ရက် နေ့လယ် ၁ နာရီဝန်းကျင်မှာ ကျော်နီမော်ရွာကို လေကြောင်းနဲ့ တိုက်ခိုက်ခဲ့ရာ အရပ်သား ၄၀ ဦး သေဆုံးပြီး ၂၀ ကျော် ထိခိုက်ဒဏ်ရာရကာ နေအိမ် ၅၀၀ ကျော်လည်း မီးလောင်ပျက်စီးခဲ့ပါတယ်။
လေကြောင်း တိုက်ခိုက်မှုကြောင့် သေဆုံးဒဏ်ရာရသူတွေထဲ ကလေးငယ်နဲ့ အမျိုးသမီးအပါအဝင် အရွယ်စုံ ပါဝင်တယ်လို့ ဦးခိုင်သုခက ရွှေဖီမြေကို ပြောပါတယ်။
“လူနေ ထူထပ်ပြီး မူဆလင်တွေ အများဆုံး နေတဲ့ရွာကို ဗုံး ထိမှန်ပြီး မီးလောင်ခဲ့တဲ့အတွက် အခုလို အသေအပျောက် များတာ ဖြစ်ပါတယ်။ ဘာတိုက်ပွဲ ဖြစ်ပွားခြင်းတဲ့ မရှိတဲ့နေရာမှာ အခုလို အပြစ်မဲ့ ပြည်သူတွေကို ဦးတည်ပစ်မှတ်ထား တိုက်ခိုက်တာဟာ အကြမ်းဖက် စစ်ကောင်စီအနေနဲ့ အလွန်ယုတ်မာတဲ့ လုပ်ရပ်ဖြစ်သလို စစ်ရာဇဝတ်မှုကို ပြောင်ပြောင်တင်းတင်း ကျူးလွန်တာဖြစ်တယ်”
မီးလောင်သွားတဲ့ နေအိမ်တွေကို ၅ နာရီ နီးပါးကြာ ငြိမ်းသက်ခဲ့ရပြီး လက်ရှိမှာ ဒဏ်ရာ ရသူနဲ့ မီးဘေးသင့်ခဲ့သူတွေကို AA နဲ့ ဒေသခံတွေက ကူညီပေးနေတယ်လို့ ဦးခိုင်သုခက ဆိုပါတယ်။
စစ်တပ်ဘက်ကတော့ ရမ်းဗြဲမြို့နယ် ကျော်နီမော်ရွာကို လေကြောင်းကနေ တိုက်ခိုက်ခဲ့တာနဲ့ ပတ်သက်ပြီး တစ်စုံတစ်ရာ သတင်းထုတ်ပြန်ထားတာ မရှိသေးပါဘူး။
ရခိုင်ပြည်နယ်မှာ စစ်တပ်က AA သိမ်းပိုက်ထိန်းချုပ်ထားတဲ့ မြို့ ရွာတွေကို လေကြောင်းကနေ တိုက်ခိုက်မှု ဆက်တိုက် ပြုလုပ်နေပြီး ပြီးခဲ့တဲ့ ဇန်နဝါရီ ၃ ရက်ကလည်း မြေပုံမြို့နယ် ကမ်းထောင့်ကြီးမြို့ကို လေကြောင်းကနေ တိုက်ခိုက်ခဲ့တာကြောင့် အမျိုးသမီးတစ်ဦး သေဆုံးခဲ့ပါတယ်။
ပြီးခဲ့တဲ့ ဒီဇင်ဘာ ၂၉ ရက်မှာ AA က နိုင်ငံရေးပြဿနာကို နိုင်ငံရေး နည်းလမ်းနဲ့ ဖြေရှင်းဖို့ အသင့်ရှိကြောင်း ထုတ်ပြန်ထားပေမဲ့ စစ်ကောင်စီက AA ထိန်းချုပ်ထားတဲ့ မြို့ ရွာတွေကို လေကြောင်းကနေ ဗုံး ဆက်တိုက် ကြဲနေတာ ဖြစ်ပါတယ်။
