ပျားကြီး၊ စက်တင်ဘာ ၁၄၊ မန္တလေး
မိုးရွာသွန်းမှုများပြားတာကြောင့် မင်းကွန်းဒေသနဲ့ မတ္တရာမြို့နယ်တွေက စစ်ဘေးရှောင်တွေအနေနဲ့ နေထိုင်စားသောက်ရေးအတွက် အခက်တွေ့နေရတယ်လို့ဒေသခံတွေကပြောပါတယ်။
မနေ့ စက်တင်ဘာလ ၁၃ ရက် ညပိုင်းကစတင်ပြီး မိုးရွာသွန်းမှုတွေ ဖြစ်ပွားခဲ့တာကြောင့် မန္တလေးမြို့အနီးဝန်းကျင်မှာ ယာယီတိမ်းရှောင်နေရတဲ့ စစ်ဘေးရှောင်တွေအနေနဲ့ မိုးရေထဲမှာနေထိုင်နေရတာဖြစ်ပါတယ်။
“ငလျင်ပြီးတော့ စစ်ဘေး၊ အခုရေဘေးပါထပ်တိုးပြီ။ ရွာပြန်လို့မရတာလည်း လနဲ့ချီနေပြီဆိုတော့ ဒုက္ခရောက်တာပေါ့ဗျာ။ အခုကမိုးပဲရှိသေးတာ၊ လေပါလာရင်တော့စဥ်းကိုမစဥ်းစားရဲတော့ဘူး”လို့ မင်းကွန်းဒေသခံစစ်ရှောင်တစ်ဦးက ပြောပါတယ်။
မင်းကွန်းဒေသတလျှောက်က ကျေးရွာပေါင်း ၁၀ ရွာထက်မနည်းနဲ့ မတ္တရာမြို့နယ်က ကျေးရွာ ၂၀ ကျော်ဟာ စစ်ကောင်စီရဲ့စစ်ကြောင်းထိုးမှုတွေ၊ လက်နက်ကြီးပစ်ခတ်မှုတွေနဲ့ လေကြောင်းတိုက်ခိုက်မှုတွေကြောင့် နီးစပ်ရာတောတောင်တွေ၊ ကျွန်းတွေနဲ့ မန္တလေးမြို့အနီးကစွန့်ပစ်မြေစာပုံတွေကြားမှာ ဖြစ်သလိုနေထိုင်နေရတာ ဖြစ်ပါတယ်။
လက်ရှိအချိန်မှာ မိုးကာ၊ ဆေးဝါးနဲ့ အစားအသောက်လိုအပ်ချက်တွေ မြင့်မားနေပြီး မိုးရေကြောင့် ဖျားနာမှုတွေရှိလာတဲ့အပြင် မြွေအပါအဝင် အဆိပ်ရှိသတ္တဝါတွေရဲ့ရန်ကိုလည်း စိုးရိမ်နေရတယ်လို့ စစ်ဘေးရှောင်တွေက ဆိုပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
