လွေးလာဝ်ဇာရ်၊ စက်တင်ဘာ ၇ ရက်၊ နမ့်ခမ်း
တအာင်းတပ်မတော်- PSLF/TNLA ထိန်းချုပ်ထားတဲ့ နမ့်ခမ်းမြို့ထဲက KTV ပိတ်တာကို လူထုတွေ ထောက်ခံပြီး ကျန်တဲ့ မြို့တွေမှာလည်း KTV၊ အနှိပ်ခန်းအားလုံး ပိတ်ပေးဖို့ ဒေသခံတွေက လိုလားနေကြပါတယ်။
နမ့်ခမ်းမြို့နယ်အပြင် ကျန်တဲ့မြို့နယ်တွေဖြစ်တဲ့ ကွတ်ခိုင်၊ သီပေါ၊ ကျောက်မဲ၊ မိုးကုတ်နဲ့ မိုးမိတ် စတဲ့မြို့နယ်မှာလည်း တော်လှန်ရေးကာလအတွင်း ယာယီ ပိတ်သိမ်းတာမျိုး မဟုတ်ဘဲ တော်လှန်ရေး မပြီးမချင်း ပိတ်စေချင်တယ်လို့ ကွတ်ခိုင်ဒေသခံ အမျိုးသားတစ်ဦးက ပြောပါတယ်။
တော်လှန်ရေးကာလမှာ ရှေ့တန်းသွားတဲ့ ရဲဘော်တွေကို အားမနာဘဲ KTV ကို တစ်လလုံး ငှားတဲ့သူတွေလည်း ရှိတယ်လို့ ဆိုပါတယ်။
ကွတ်ခိုင်ဒေသခံ အမျိုးသားတစ်ဦးက “နေရာတကာဘဲ။ ရှေ့တန်း သွားတဲ့သူတွေကို အားမနာဘဲ KTV ကို တစ်လလုံးလုံး ငှားပြီး ဝင်တာလဲ ရှိတယ်။ KTV ဝင်တဲ့ အကြောင်းအရင်းက တချို့လူတွေဆို K ရွှေတို့ လက်နက် မူးယစ်ဆေးဝါကအစ အဲမှာ အရောင်းအဝယ် လုပ်နေကြတယ်။ ရှေ့တန်းသွားတဲ့ တချို့ရဲဘော်ကြတော့ အသက်၊ သွေး၊ ချွေး ကိုယ်လက်အင်္ဂါတွေ စတေးပြီးတော့မှ အန္တရာယ်စက်ကွင်းထဲမှာ နေပြီး ထမင်းနပ်မှန်အောင်တောင် မစားရ မသောက်ရ သူတို့ရတဲ့ လစာက ဆေးလိပ်ဖိုးတောင် မကာဘူး” လို့ ပြောပါတယ်။
ဒါ့အပြင် KTV ကြောင့် အိမ်ထောင် ကွဲသွားတဲ့ မိသားစုနဲ့ ပျက်စီးနေတဲ့ လူတွေလည်း အများဆုံး တွေ့ရတယ်လို့ သူက ဆက်ပြောပါတယ်။
“KTV တွေအားလုံးကို ပိတ်ပေးစေချင်တယ်။ ဘာကြောင့်လဲဆိုတော့ အိမ်ထောင် ကွဲသွားတဲ့သူတွေလည်း အများကြီးဘဲ။ ပြီးတော့ ပျက်စီးနေတဲ့ လူငယ်တွေလည်း အများကြီးဘဲ။ နောက်နောင် တက်လာမယ့် ကိုယ့်ရဲ့ မျိုးဆက်လူငယ်တွေလည်း မပျက်စီးစေချင်ဘူး။ KTV ကြောင့် တချို့လည်း မယားငယ်၊ လင်ငယ်တွေနဲ့ ထားကြတယ်။ အိမ်ထောင်ရှိ တချို့အမျိုးသမီးလည်း ပါတယ်” လို့ ပြောပါတယ်။
KTV ထဲမှာ သုံးစွဲနေတဲ့ မူးယစ်ဆေးဝါးတွေဖြစ်တဲ့ K၊ ရွှေကြောင့်လည်း မပျက်စီးသင့်တဲ့ အမျိုးသမီးငယ်၊ မပြိုကွဲသင့်တဲ့ အိမ်ထောင်သည်တွေ ပျက်စီးနေကြတယ်လို့ နမ့်ခမ်းမှ ဒေသခံတစ်ဦးကလည်း ပြောပါတယ်။
“အခု နမ့်ခမ်းလိုမျိုး ပိတ်တာ ကျမ ထောက်ခံတယ်။ K သောက်ပြီး အမျိုးသမီးတွေက မူးရူးပြီးတော့ မဖြစ်သင့်တာ ဖြစ်ကုန်ရော။ ပြီးတော့ တချို့အရာရှိကလည်း အကုန်လုံးတော့ မဆိုလိုဘူး သူတို့တော့ အဲမှာ ပိုက်ဆံတွေ ဖြုန်းနိုင်တယ်။ ရှေ့တန်းမှာ တိုက်ပွဲ ဝင်နေတဲ့သူတွေတော့ အစစအရာရာ မပြည့်စုံဘူး။ KTV မှာ သုံးဖြုန်းမယ့်အစား ရှေ့တန်းမှာ သုံးမယ်ဆိုရင် ဘယ်လောက်အထိ အကျိုးရှိမလဲပေါ့နော်။ အဲလိုပြောတော့လည်း ငါတို့ပိုက်ဆံရှိလို့ သုံးနိုင်ဖြုန်းနိုင်တယ်ဆိုပြီး ပြောသံတွေ ကြားနေရတယ်။ အဲလိုကြတော့ ခေါင်းဆောင်ကောင်း မပီသဘူးလို့ မြင်တယ်ပေါ့နော်။ နောက်တစ်ခုက အိမ်ထောင်ရှိတဲ့သူတွေလည်း အဲပိုက်ဆံတွေ ကိုယ့်မိသားစုကို ပေးလိုက်ရင် ဘယ်လောက်အထိ အကျိုးရှိမလဲ”
ပြီးခဲ့တဲ့ စက်တင်ဘာ ၃ ရက်ကစပြီး KTV ဆိုင်တွေကို ပိတ်ထားဖို့ တအာင်းတပ်ဘက်က တရားဝင် အသိပေးထားတာဖြစ်ပြီး ဆိုင်ပိတ်ထားဖို့ ကြေညာထားတဲ့ ကာလအတွင်း စည်းကမ်း ချိုးဖောက်ပြီး ဆိုင်ဖွင့်ရင် ပြင်းပြင်းထန်ထန် အရေးယူသွားမယ်လို့လည်း ဆိုပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
