ပိုႈလဘား၊ ကျံရ်ဆဲပ်တီမ်ဘာ ဆငည်း 9၊ အေဲမ်ခြီရ်
TNLA ကဲ ပ္လိူရ်ႈပ္လူႈဆဒိ ကနာည်နံင်ဘိအူန်း KTV ပ်ုန်ႎိူဝ်ႈအူန်းအီး ခေဲင်ကီုင်းအေဲမ်ခြီရ် ကပီုန်ဆျှံမ်ကဒါႇပိူည် အ်ုန်အီမိုႈ ဒီပ်ုန်ထိင်ခြဲအူန်း တံပ်ဆီုက်တအာင်း PSLF/TNLA ကဲနီန် အာဝ်မိူဝ်ႈထာန်ပ္လအူန်း ဆငည်းအောႏ။
ဇူႈပွံတ် ခည်ကျံရ်ဆဲပ်တီမ်ဘာ ဆငည်း 3ဒိူန် TNLA ကဲ ပ္လိူရ်ႈဖါ်ႈ ကနာည်နံင်ဘိအူန်း KTV ဇိုချီုင်ပ္လိူရ်ႈအူန် ကနာည်နံင်ဘိဆဴင်ကဲဒီန် ဆာ်မိူဝ်ႈဖါ်ႈ အီလူည်ႇခေါမ်ပြာႇ ႎိူဝ်ႈဟာဝ်းဆဴင် ကဲဒါႈ နံင်တိူဝ်ႈလာည်းအရေး ဒါင်းဒါင်းအောႏ။
ကဝ်အီနံပ်ဘည်မိုႈဘည်ဘာည်းနီန်အူအီး က္လာင်းဒါႈ “ဆေဘာည်းကဲစီဘိနီန်မိုႈ ဂေါႇလံပ်အရေးတီုင်ကုင် ကဇေန်နီးနီန်ဒီးကော်။ ဆာ်မိူဝ်ႈဆဴင်ကဲ အီဘြားႎိူဝ်ႈဒိူန် ကဲဆူည်ႇအီးဂြီရ်ႈရောည်တည်း။ ဆာ်မိုႈလိူဝ်ႈအူ ညှံမ်ဆူည်ႇစိ ကဲရေဲန်ဆေ။ ဆာ်မိုႈလိူဝ်ႈအာရ် မိူဝ်ႈအေ့ ပ်ုန်နံင်ဆူည်ႇတကဲရေဲန်ဒီးကော်။ ဂေါႇမိုႈမိူဝ်ႈအီ ဘြားႎိူဝ်ႈ ခည်ဆငည်း 4ဒိူန် စီပဲန်ကဲဘ်ုပ် ဂြီရ်ႈရောည်တည်း”
ဆာ်ရောတ်စာ်မ်း အခိင်ဘိူန်းႎီရ်ႎိူဝ်ႈ ဆဴင် KTV ဒီန် ယဲနံင်ပ္လိူရ်ႈ ပ္လူႈဘိုးဆဒိယာ့်အောႏ။
မိူဝ်ႈဘိုး ကောန်အီမာည်း ကဝ်အီဂေါည်ခေဲင်အရာပ်နီန်အူအီး က္လာင်းဒါႈ “ပအေဲမ်ခြီရ်မာ် ဘံန်မိုႈဆဒါင်လေႈဒေဲႈဂည်မျိုး ဘံန်မိုႈလံပ်အရေးတီုင်ကုင်နီန် ကႎှ်ုရ် စီပဲန်ဘိအူန်း အူကဇီန်။ အောထာင် နံင်ဘိအူန်းလိူည် ဇိုချီုင်အူကဇီန်။ ဆာ်ဟည်ဘိူန်းႎီရ်ႎိူဝ်ႈ ကဲနံင်က္လာင်းဒေဲႈဘိုး”
ဆဲႈဒါႇဒီန် ပကီုင်းမာဝ်းႎံင်း အ်ုန်အီမိုႈ ဒီပ်ုန်ထိင်ခြဲအူန်း တံပ်ဆီုက်တအာင်းကဲမာ် ကဲဘိအူန်းဖါ်ႈ ဆဴင် KTV ဆာ်မိုႈကီုင်းအီဟံရ် ညှံမ်မိူဝ်ႈစိ ဘည်ဘိအူန်းကဲ ဘာည်းကဇေန်နီးနီန်အောႏ။
ပအရာပ်ထိင်ခြဲအူန်း တံပ်ဆီုက်ခါင် KIO/KIA ကဲမာ် တီုင်ဌာနလံပ်ဘြောင်ချှာင် KIO ကဲ ပ္လိူရ်ႈဒဲႈဆဒိ ကနာည်နံင်ဘိအူန်း KTV၊ နည့်ကလဲပ်ကာည်း ဘားကဲနီန် အိုရ်ဆီုင်ခည် ကျံရ်ဇူန် ဆငည်း 22ဒိူန်အောႏ။
ကဝ်အီကပ္လါႇဘေဲႇဆဒါင် – Lway N Tra
ဆဒါင်ဖုင်ယဲဆျှိုည်ဖီမျေနီန် အာဝ်ႎံန်း ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင် ချှံန်နယ် ပ်ုန်ကိက်ပ္လေႈ ရခြူမ်ကဲနီန်အောႏ။
