ပို့လဘား၊ စက်တင်ဘာ ၉ ရက်
တအာင်းတပ်ထိန်းချုပ်ထားတဲ့ သီပေါမြို့နယ်နဲ့ ကိုးကန့်တပ်ထိန်းချုပ်ထားတဲ့ လားရှိုးမြို့နယ်မှာ ရောက်ရှိနေတဲ့ စစ်ဘေးရှောင် အယောက် ၂ ထောင်ကျော်အတွက် အရေးပေါ်အကူအညီလိုအပ်နေတယ်လို့ ဇာတိမြေကျောက်မဲ ပရဟိတအသင်းက ရွှေဖီမြေကို ပြောပါတယ်။
ပြီးခဲ့တဲ့ ဩဂုတ် ၂၄ ရက်မှာ နောင်ချို၊ ကျောက်မဲ၊ နောင်ပိန်က ဒေသခံတွေဟာ သီပေါမြို့နယ် ဘော်ကြိုနဲ့ ဆွတ်လန်းကျေးရွာဘက်ကို လာရောက်စစ်ရှောင်နေကြတာဖြစ်ပြီး စားသောက်ကုန်တွေဖြစ်တဲ့ ဆန်၊ဆီ၊ဆားတွေအပြင် ဆေးဝါးတွေကိုလည်း အကူအညီလိုအပ်နေတယ်လို့ ဆိုပါတယ်။
“သူတို့ ဘော်ကြိုဘက်မှာ အရင်ရှောင်လာတာ။ အဲမှာမဆန့်တော့ ဆွတ်လန်းဘက် ပို့လိုက်တယ်။ အခု စစ်ရှောင်၂ထောင်ကျော်က လားရှိုးမြို့ထဲ ပို့ထားတဲ့စာရင်းမပါသေးဘူး။ လားရှိုးသီးသန့်ပဲ ထားပေးလိုက်တယ်။ သူတို့ဘက်မှာလည်း အလှူရှင်တွေ တအားပေါတယ်လေ။ အခုဆွတ်လန်းနဲ့ ခေးနင်းဘက် ရောက်လာတဲ့ စစ်ရှောင်တွေပဲ။ ဒီဘက်မှာ လာလှူတဲ့သူတွေလည်း သိပ်မရှိဘူး။ သူတို့ ဆန်တွေအရမ်းလိုအပ်တယ်။ မနေ့သွားကူတာ ဆွတ်လန်းတစ်နေရာကို စစ်ရှောင် ၁၅၀ ပဲရှိတာ။ သူတို့တောင်မှ ဆန်ကုန်နေတဲ့အခြေနေလေး ရောက်နေပြီ။ လူတွေအရမ်းများပြီး အလှူငွေတွေလည်း အရမ်းနည်းလို့ အများကြီးမလှူနိုင်ဘူး။ တစ်ယောက်ကို ဆန်က ၃ ပြည်၊ ဆီက ၁ ပိဿာ၊ ကြက်ဥ တစ်ကဒ် အဲလိုပဲလှူပေးခဲ့တယ်” လို့ ပြောပါတယ်။
စစ်ရှောင်လာကြတဲ့သူတွေဟာ နောင်ချို၊ နောင်ပိန်၊ ကျောက်မဲနဲ့ သီပေါမြို့နယ်က ဒေသခံအများစုဟာ လေကြောင်းအန္တရာယ် စိုးရိမ်နေကြတာဖြစ်ပြီး သီပေါမြို့နယ် ဆွတ်လန်းကျေးရွာနဲ့ ကိုးကန့်တပ်ထိန်းချုပ်ထားတဲ့ လားရှိုးမြို့နယ် ခေနင်း၊ စံဖြတ်ကျေးရွာတွေမှာ ထွက်ပြေးတိမ်းရှောင်နေတာဖြစ်တယ်လို့ ဆိုပါတယ်။
လက်ရှိမှာတော့ ကျောက်မဲမြို့နယ် နောင်ပိန်ကျေးရွာဘက်ကို စစ်ကောင်စီတပ်နဲ့ TNLA တို့အကြား တိုက်ပွဲဆက်လက်ပြင်းထန်နေပြီး တိုက်ပွဲကြောင့် ဒေသခံ သောင်းနဲ့ချီဟာ နီးစပ်ရာတွေမှာ ထွက်ပြေးတိမ်းရှောင်နေကြရပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
