မြတ်နိုး၊ ဇန်နဝါရီ ၈ ရက်၊ မံစီ
ကချင်ပြည်နယ်ရဲ့ ဒုတိယမြို့ဝောာ်ဖြစ်တဲ့ ဗန်းမော်မြို့အနီးက မံစီမြို့အခြေစိုက် စစ်ကောင်စီရဲ့ လက်ကျန်စခန်းအားလုံးကို ဒီနေ့ ဇန်နဝါရီ ၈ ရက် မနက် ၁၀ နာရီကျော်မှာ KIA နဲ့ ပူးပါင်းတပ်ဖွဲ့က အပြီးသတ် သိမ်းပိုက်လိုက်ကြောင်း ရှေ့တန်း သတင်းရင်းမြစ်တွေဆီက သိရပါတယ်။
“မံစီ သိမ်းပြီး ပြန်လာပြီ။ မံစီ အပြီးသတ် သိမ်းလိုက်ပြီ။ ကျနော်တို့က ၃၁၉ နဲ့ ၆၀၁ သိမ်းပြီး ပြန်လာတာ” လို့ ရှေ့တန်း သတင်းရင်းမြစ် ၂ ဦးက ပြောပါတယ်။
မံစီရှိ စစ်ကောင်စီရဲ့ နောက်ဆုံး လက်ကျန်စခန်းဖြစ်တဲ့ ခြေမြန်တပ်ရင်း (ခမရ ၃၁၉၊ ၆၀၁)၊ အမြှောက်တပ် (အမတ ၃၅၂) စတဲ့တပ်စခန်း သုံးခုစလုံးကို ကချင်တပ်မတော်- KIA နဲ့ ပူးပေါင်း တော်လှန်ရေးတပ်ဖွဲ့က အပြီးသတ် သိမ်းပိုက်လိုက်တာလို့ ရှေ့တန်းနဲ့ နီးစပ်သူတစ်ဦးကလည်း ပြောပါတယ်။
တပ်ဆုတ်သွားတဲ့ စစ်ကောင်စီတပ်ဖွဲ့ကိုတော့ လိုက်လံ ရှင်းလင်းနေဆဲ ဖြစ်တယ်လို့ သူက ပြောပါတယ်။
မံစီတိုက်ပွဲမှာ ခမရ ၆၀၁ က ဗျူဟာမှူး သေဆုံးခဲ့ပြီး စစ်ကောင်စီရဲ့ လက်နက်ခဲယမ်းနဲ့ ဖမ်းဆီးရမိထားတဲ့ သုံ့ပန်း အများစုလည်း ရှိတယ်လို့ ဆိုပါတယ်။
မံစီမြို့ရဲ့ သုံးပုံနှစ်ပုံခန့်ကို KIA နဲ့ ပူးေပါင်း တော်လှန်ရေးတပ်ဖွဲ့က ပြီးခဲ့တဲ့ ၂၀၂၄ ဒီဇင်ဘာ ၂၅ ရက်ကတည်းက ထိန်းချုပ်နိုင်ခဲ့ပြီးဖြစ်တယ်လို့ ရှေ့တန်း သတင်းရင်းမြစ်တွေဆီက သိရပါတယ်။
စစ်ကောင်စီရဲ့ ဝါဒဖြန့် တယ်လီဂရမ် ချန်နယ်တစ်ခုမှာလည်း မံစီရှိ ခမရ ၃၁၉၊ ၆၀၁၊ အမတ ၃၅၂ တပ်စခန်းတွေ တပ်ဆုတ်သွားပြီဖြစ်ကြောင်း ဖော်ပြထားပါတယ်။
ပြီးခဲ့တဲ့ ဒီဇင်ဘာ ၄ ရက်ကစ ဗန်းမော်နဲ့ မံစီမြို့ကို KIA နဲ့ ပူးေပါင်းတော်လှန်ရေး တပ်ဖွဲ့တွေက တစ်ချိန်တည်း ထိုးစစ်ဆင်ခဲ့တာဖြစ်ပြီး ဗန်းမော်မြို့မှာတော့ တိုက်ပွဲ ပြင်းထန်နေဆဲ ဖြစ်တယ်လို့ ဆိုပါတယ်။
