မိုင်းရူပ၊ ဇန်နဝါရီ ၈ ရက်
ရှမ်းမြောက်က ကြံစိုက်ပျိုးထားတဲ့ဒေသမှာ ကြံတွေ စခုတ်နေပြီး ကြံ ၁ တန်ကို တရုတ်ငွေ ယွမ် ၃၀၀ ကျော် (ကျပ် ၁ သိန်းခွဲဝန်းကျင်) စျေးရတယ်လို့ ကြံတောင်သူတွေက ရွှေဖီမြေကို ပြောပါတယ်။
ရှမ်းမြောက် သိန္နီ၊ ကွတ်ခိုင်၊ နမ့်ဖတ်ကာနဲ့ မိုင်းယုလေး၊ မူဆယ် ၁၀၅ မိုင်၊ ပန်ဆိုင်း (ကြူကုတ်)မြို့နဲ့ မုံးကိုးမြို့မှာ ကြံတွေကို အဓိက စိုက်ပျိုးကြတာ ဖြစ်ပါတယ်။
ကြံစိုက်တောင်သူတစ်ဦးက “တရုတ်ငွေ ၃၀၅ ကျပ် ပေးမယ်လို့ ပြောတယ်။ နမ့်ဖတ်ကာတစ်ကြောကထွက်တဲ့ ကြံတွေကိုတော့ နမ့်အွမ်က ကြံစက်ရုံမှာ အဓိက ပို့တာ” လို့ ရွှေဖီမြေကို ပြောပါတယ်။
လက်ရှိ ရှမ်းမြောက်က ကြံစိုက်တဲ့နေရာအများစုမှာ ကြံ စခုတ်နေပေမဲ့ ကွတ်ခိုင်မြို့နယ် နမ့်ဖတ်ကာနဲ့ မိုင်းယုလေးမှာတော့ လမ်း ပြုပြင်နေဆဲ ဖြစ်တာကြောင့် ကြံ မခုတ်နိုင်သေးဘူးလို့ သူက ဆက်ပြောပါတယ်။
ဒီနှစ် ကြံခုတ်ရာသီမှာ ကြံခုတ်သူတွေအတွက် ကြံ ၁ စည်းကို ၅၀၀ ကျပ် ပေးတယ်လို့ သိန္နီမြို့နယ်မှာ ကြံခုတ်နေတဲ့ ဒေသခံတစ်ဦးက ရွှေဖီမြေကို ပြောပါတယ်။
“ကိုယ့်ဟာကိုယ်စား ၁ စည်း ၅၀၀ ပေးတယ်။ ၁ စည်းကို အချောင်း ၂၀ ထည့်ရတယ်”
ပြီးခဲ့တဲ့နှစ်က ကြံစိုက်ရာသီမှာတော့ ကြံ ၁ တန်ကို တရုတ်ငွေ ယွမ် ၂၈၀ ရရာကနေ ဒီနှစ်မှာ ကြံ ၁ တန်ကို တရုတ်ငွေ ၃၀၀ ကျော် ဈေးတက်လာပေမဲ့ အဆမတန် မြှင့်တက်လာတဲ့ ကုန်စျေးနှုန်းကြောင့် ဒေသခံတွေအတွက် မကာမိဘူးလို့ ကြံစိုက်တောင်သူက ပြောပါတယ်။
ရှမ်းမြောက်မှာထွက်တဲ့ ကြံတွေကို မူဆယ်မြို့နယ် နမ့်အွမ်ရွာရှိ သကြားစက်ရုံ၊ ညီနောင်မဟာမိတ် ၃ ဖွဲ့ ထိန်းချုပ်ထားတဲ့ တရုတ်-မြန်မာနယ်စပ် ကျင်စန်းကျော့နဲ့ ချင်းရွှေဟော်ဂိတ်ကနေတဆင့် တရုတ်နိုင်ငံဘက်ကို တင်ပို့ကြတာ ဖြစ်ပါတယ်။
