လွေးလာဝ်ဇာရ်၊ ဇန်နဝါရီ ၇ ရက်၊ မိုင်းကိုင်
ရှမ်းတောင် မိုင်းကိုင်မြို့နယ် ပန်ကေတုကျေးရွာအုပ်စု မောက်လျန်ရွာအနီး ပေါက်ကွဲမှုတစ်ခု ဖြစ်လို့ဆိုပြီး ရွာခံ ၉ ဦးကို ရှမ်းပြည်တိုးတက်ရေးပါတီ- SSPP က ဖမ်းဆီးခေါ်ဆောင်သွားပါတယ်။
မနေ့ ဇန်နဝါရီ ၆ ရက်မှာ ဖြစ်ပွားခဲ့တာဖြစ်ပြီး ပေါက်ကွဲမှုကြောင့် မောက်လျန်ရွာက အမျိုးသား ၉ ဦးကို SSPP တပ်ဖွဲ့က ဖမ်းဆီးခေါ်ဆောင်သွားတာ ဖြစ်ပါတယ်။
SSPP ဖမ်းဆီးသွားတဲ့ ရွာခံ ၉ ဦးထဲမှ ၈ ဦးကို ပြန်လွှတ်ပေးခဲ့ပေမဲ့ တစ်ဦးကိုတော့ ပြန်မလွှတ်ပဲ ဖမ်းဆီးထိန်းသိမ်းထားဆဲလို့ သိရပါတယ်။
“မနေ့က မောက်လျန်ရွာနားမှာ ဗုံးတစ်လုံးပေါက်ကွဲမှု ဖြစ်တယ်။ အဲရွာကလူတွေ အဲပေါက်ကွဲမှု သံသယကြောင့် ကိုးယောက် ဖမ်းခံရတယ်။ ရှစ်ယောက်ကတော့ ပြန်လွှတ်လာပြီ။ တစ်ယောက်က ထိန်းထားနေဆဲဖြစ်တယ်” လို့ ဖြစ်စဉ်သိရှိသူ အမျိုးသားတစ်ဦးက ပြောပါတယ်။
ဖမ်းဆီးထိန်းသိမ်းခံထားရတဲ့ အမျိုးသားဟာ ၄၇ နှစ်အရွယ်ရှိ ဦးကြည်ညွန့်ဆိုသူဖြစ်ပြီး သူ့ကို ဘာကြောင့် ပြန်မလွှတ်ပေးသေးလဲဆိုတာကိုတော့ သေချာမသိရဘူးလို့ အထက်ပါ အမျိုးသားက ဆက်ပြောပါတယ်။
“ဖမ်းခံရတဲ့သူတွေ အကုန်လုံးက အမျိုးသားတွေဘဲ။ အမျိုးသမီး မပါဘူး။ သူတို့ပြောတာတော့ ဗုံးပေါက်ကွဲချိန် တွေ့လားတဲ့။ မတွေ့ဘူးပြောရင် ပြန်လွှတ်ပေးတယ်။ အဲတစ်ယောက်ကို ဘာကြောင့် ဖမ်းထားနေတုန်းလဲဆိုတာ မသိရဘူး”
ဒါ့အပြင် ပန်ကေတုအုပ်စုထဲက ကျေးရွာခံတွေကိုလည်း SSPP တပ်ဖွဲ့က စစ်ဆေးမှု ပြုလုပ်မယ်ဆိုပြီး တောင်ယာ၊ လယ်ယာသို့ မသွားခိုင်းဘူးလို့ သိရပါတယ်။
ဦးကြည်ညွန့်ကို SSPP က ဖမ်းဆီးထိန်းသိမ်းထားတာနဲ့ ပတ်သက်ပြီး တုန့်ပြန်ချက်ရဖို့ SSPP ရဲ့ ပြောရေးဆိုခွင့်ရှိသူ ဗိုလ်မှူး စိုင်းဖုန်းဟန်ကို ဖုန်းနဲ့ အကြိမ်ကြိမ် ဆက်သွယ်ပေမဲ့ ဆက်သွယ်လို့ မရခဲ့ပါဘူး။
မိုင်းကိုင်မြို့နယ်မှာ SSPP က တပ်သားသစ် စုဆောင်းတာနဲ့ ကျေးရွာအုပ်စုတွေမှာ ငွေတောင်းတာတွေ မကြာခဏ လုပ်ဆောင်နေတယ်လို့ မိုင်းကိုင် ဒေသခံတွေက ရွှေဖီမြေကို ပြောဆိုထားဖူးပါတယ်။
