လိုည်းလာဝ်ဇာရ်၊ အောဂ်ုတ် ဆငည်း 29၊ မိူင်ယဲ
ကဝ်အီနံပ် ဘည်မိုႈဘည်ဘာည်း နီန်အူအီး က္လာင်းတဖုင်ဆျှိုည်ဖီမျေဒါႈ ဒီဘိူန်းတံပ်ကညာအာဏာဆီုက်ဇေဝ်ကဲတထိင်ခြဲ ပဂေတ်မိူင်ယဲနီန် ကဲကဲပ်ကဆဝ်းဇာဝ်းရိူန်းနီန်တ ကညာကားကဲ ဒါႈမိုႈ ကနာည်လံပ်ကတ်ုမ်အောႏ။
ကဲဒါႈ တကညာကားကဲ ကနာည်းတားဗျူဟာ တာမ်ခူန်အွံရ်ဒါင်း မျိုးမောင်မောင်နီန် ယိူဝ်ႇ1 ဆဲန်ရောတ် 1လေႈ 3မှီူန်၊ ကနာည်တာအိူင်တာန်ယာန်နီန် 7 မှီူန်၊ ကနာည်း တပ်အမျောက်တာန်ယာန် ခူန်အွံရ်ဇော်ဇော်နီန် 3 မှီူမ်၊ ကနာည်ဖုင်ပလိက်ကဲနီန် ကဲကဲပ်ဟာဝ်း 8 မှီူန်အောႏ။
ကဝ်အီနံပ်ဘည်မိုဘည်ဘာည်း ကောန်အီမာည်းအူအီး က္လာင်းဒါႈ “ ကဲကဲပ်လိူည်း ဒီလီပ်လေႈအီးခေဲင်ကီုင်းဒီန်။ ကဲဂီုည်ဒါႈလိူည်း ရူရ်ႈအီနူးအီနီန်ကဲပ်ဟာဝ်း။ ကားအီတာင်ကြာႇကဲဒိူန် ကဲဒါႈကနာည်တားဗျူဟာနီန် လိုပွံတ်ဒဲႈ 3 ဆဲန်။ လိုဘိုးဒဲႈတဖုင်ပလိက်ကဲ 2 ဆဲန်လေႈ ၅ မှီူန်။ ဒါႈဘိုးကနာည်တားအိူင်တာန်ယာန်နီန် ကတူႈဘိုးဒဲႈ 2 ဆဲန်”။
အ်ုန်ဒါႈ ဆဲႈဒါႇတံပ်ကညာအာဏာဆိုက်ဇေဝ်ကဲ ကတူးဘိုးဒဲႈ တတံပ်ဆီုက်ဆျှံမ် SSPP ကဲ ကားအူကြောင်နီန် 3 မှီူန် ကားအီတာင်ကြာႇနီန် အူကြောင်ဒီန်ယိူဝ်ႇ 7 မှီူန် ရောတ် 1ဆဲန်လေႈ 5 မှီူန်အောႏ။
“ တကားအီဘတဂါင်ဒိူန် ကဲအာဝ်ကဲပ်စီဘည်ဒီန်။ ကဲမှာန်းလိူည်းဘာည်း ရူရ်ႈကဘ။ ကားကဲအီဟာဝ်းႎီရ် ကဒါႇလာဆေဝ်ကာည်း တောင်ကြီးနီန် ကဲကဲပ်မှာန်းအေ့။ ကႎေအေ့ ကညာကားကဲ။ ကဲမာ်အာဝ်တိူရ်ႈစိ ကူန်ရဝ်မာဂါင်ကဲ ကဲနံပ်လိူည် ကနာည်နံင်ဘိူန်းကဲတ ရိူန်းနီန်”။
ကဲဒါႈ ပဂေတ်ဒီန် အူဆငည်းနီန် ကားကဲအီခ္လေါႈဟာဝ်းယိူဝ်ႇပွံတ် 40 ကြောင်ရောတ် 60 ကြောင်အော ဂေါႇမိုႈကဲဂီုည်ကဲပ်ကဆဝ်းဇာဝ်းရိူန်းဘည်ဒီန် ကညာကားကဲကတူႈခည်းကီန်ဒည်းအောႏ။
ကညာကား ကာည်း တိုအီးအရာပ်ကဲဒါႈ ပဂေတ်ဒီန် အာဝ်မိူဝ်ႈစိ ဘည်တခေါရ်ကဲ ကနာည်အီယံင်းလာက်နာက် ကာည်း ခံင်မဝ်းကဲနီန် ကဲဂီုည်နှဲလိူည်လာ်ဒါလံပ်ကတ်ုမ်နီန် စီကဲပ်ရိူန်းအောႏ။
ကဝ်အီကပ္လါႇဘေဲႇဆဒါင် – လိုည်းပိုႈဆပေ
ဆဒါင်ဖုင်ယဲဆျှိုည်ဖီမျေဂဲနီန် အာဝ်ႎံန်းလိူည် ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင်ချှံန်နယ် ပ်ုန်ကိက်ပ္လေႈအူန်း ရခြူမ်ကဲနီန်အောႏ။
