လွေးဇွန်မိုး၊ ဇန်နဝါရီ ၇ ရက်၊ ဆီဆိုင်
ရှမ်းတောင် ဆီဆိုင်မြို့နယ် ထီစုံကျေးရွာထဲ စစ်ကောင်စီတပ်က ဒရုန်းနဲ့ မီးလောင်ဗုံး ကြဲချတိုက်ခိုက်လို့ နေအိမ် ၂ လုံး မီးလောင်ပျက်စီးသွားခဲ့တယ်လို့ ပအိုဝ်းတပ်မတော်- PNLA က ဒီနေ့ ဇန်နဝါရီ ၇ ရက်မှာ ထုတ်ပြန်လာပါတယ်။
မနေ့ ဇန်နဝါရီ ၆ ရက် မနက် ၉ နာရီမှာ လွယ်ထွယ်ရွာထဲ တပ်စွဲထားတဲ့ စစ်တပ်က ထီစုံရွာဘက် ဒရုန်းနဲ့ မီးလောင်ဗုံး ကြဲခဲ့တာဖြစ်ပြီး မီးလောင်တဲ့ နေအိမ်ကို PNLA တပ်က မီးငြိမ်းပေးခဲ့တယ်လို့ PNLA ရဲ့ ပြောရေးဆိုခွင့်ရှိသူ ခွန်ရိန်းယံက ပြောပါတယ်။
“လွယ်ထွယ်ကျေးရွာမှာ တပ်စွဲထားတဲ့ စစ်ကောင်စီတပ်က ဒရုန်းနဲ့ လာကြဲတာပေါ့နော်။ ထီစုံကျေးရွာထဲကို ကြဲတာ။ သူတို့က နေ့တိုင်းလိုလို အဲလိုမျိုး ရွာထဲကို ဒရုန်းတွေနဲ့ ဗုံးကြဲတော့ ရွာသူရွာသားတွေလည်း ရွာထဲမှာ မနေရဲကြတော့ဘူး”
စစ်တပ်က ဗုံးကြဲတဲ့ ထီစုံရွာဟာ တိုက်ပွဲ ဖြစ်ပွားတာမရှိသလို တော်လှန်ရေးတပ်ဖွဲ့ တပ်စွဲထားတာလည်း မရှိဘူးလို့ ခွန်ရိန်းယံက ပြောပါတယ်။
ထီစုံရွာကို စစ်တပ်က နေ့တိုင်းနီးပါး ဒရုန်းနဲ့ လက်နက်ကြီး အသုံးပြုပြီး တိုက်ခိုက်နေတာကြောင့် ထီစုံရွာက နေအိမ် ၂၄ လုံး ထိခိုက်ပျက်စီးခဲ့တယ်လို့ PNLA ရဲ့ ထုတ်ပြန်ချက်မှာ ဖော်ပြထားပါတယ်။
