မိုင်းရူပ၊ ဇန်နဝါရီ ၇ ရက်၊ တောင်ကြီး
စစ်ကောင်စီ ထိန်းချုပ်ထားတဲ့ ရှမ်းတောင် တောင်ကြီးမြို့မှာ လျှပ်စစ်မီး ပြတ်တောက်နေပြီး တစ်ရက်ကို မိနစ်ပိုင်းသာ ပေးနိုင်တော့တယ်လို့ ဒေသခံတွေက ရွှေဖီမြေကို ပြောပါတယ်။
ပြီးခဲ့တဲ့ အပတ်တွေမှာ တစ်ရက်ကို နာရီပိုင်းအထိ လျှပ်စစ်မီး ပေးနိုင်ပေမဲ့ ဒီရက်ပိုင်းမှာတော့ တစ်ရက်ကို ၁၀ မိနစ်ကနေ ၁၅ မိနစ်ကြားသာ ပေးနိုင်တော့တယ်လို့ တောင်ကြီးဒေသခံ အမျိုးသားတစ်ဦးက ရွှေဖီမြေကို ပြောပါတယ်။
“ဒီရက်ပိုင်းဆို မီးပျက်တဲ့အချိန်က များနေတယ်။ ကျနော်တို့ဆို မီး မမြင်ရတာ ၃ ရက် ရှိပြီ။ တချို့ရက်တွေဆို ၁၀ မိနစ် လာတာ ရှိတယ်။ တချို့ရက်ဆို ၁၅ မိနစ် လာတာ ရှိတယ်”
လျှပ်စစ်မီး ပြတ်တောက်မှုကြောင့် ချက်ပြုတ်ရေးအပါအဝင် လျှပ်စစ်မီးကို အားထားပြီး လုပ်နေရတဲ့ လုပ်ငန်းတွေမှာလည်း အခက်အခဲ ကြုံနေကြရတယ်လို့ သူက ဆက်ပြောပါတယ်။
တောင်ကြီးအပြင် နိုင်ငံတဝန်းက စစ်ကောင်စီ ထိန်းချုပ်ထားတဲ့ ရန်ကုန်၊ မန္တလေးနဲ့ နေပြည်တော်အပါအဝင် ဒီရက်ပိုင်းအတွင်း လျှပ်စစ်မီး ဆိုးဆိုးဝါးဝါးပြတ်တောက်နေပြီး တစ်ရက်ကို မိနစ်ပိုင်းသာ ပေးနိုင်တော့တဲ့အခြေအနေ ဖြစ်နေပါတယ်။
စစ်ကောင်စီဘက်က လျှပ်စစ်မီး မပေးနိုင်တာကြောင့် လူထုအပြင် စစ်ကောင်စီကို ထောက်ခံတဲ့ တယ်လီဂရမ် ချန်နယ်တွေမှာပါ စစ်ကောင်စီကို ဝေဖန်ရေးသားပြောဆိုနေတာ တွေ့ရပါတယ်။
စစ်ကောင်စီရဲ့ လျှပ်စစ်စွမ်းအင် ဝန်ကြီးဌာနကတော့ တစ်နိုင်ငံလုံး အတိုင်းအတာနဲ့ လျှပ်စစ်ဓာတ်အား တစ်ရက်ကို (၂,၂၀၀)မဂ္ဂါဝပ်ခန့်သာ ထုတ်လုပ်နိုင်ပြီး ထုတ်လုပ်နိုင်မှုရဲ့ ၅၀ ရာခိုင်နှုန်းခန့်ကိုသာ ဖြန့်ဖြူးပေးနိုင်တာလို့ မနေ့ ဇန်နဝါရီ ၆ ရက်မှာ ထုတ်ပြန်ထားပါတယ်။
