ယာရူစိင်၊ ဩဂုတ် ၂၅ ရက်၊ မိုးကုတ်
PSLF/TNLA ထိန်းချုပ်ထားတဲ့ မိုးကုတ်မြို့အရှေ့ပိုင်းကို စစ်တပ်က လေကြောင်းကနေ ဗုံးထပ်ကြဲခဲ့တယ်လို့ ဒေသခံ အမျိုးသားတစ်ဦးက ရွှေဖီမြေကို ပြောပါတယ်။
ဒီနေ့ ဩဂုတ် ၂၅ ရက် ည ၁၁ နာရီဝန်းကျင်မှာ မိုးကုတ်မြို့အရှေ့ပိုင်း စည်ပင်သာယာရပ်ကွက်ရှိ ဆင်တောင်ကျောင်းအနီးကို စစ်တပ်က ဗုံးကြဲတိုက်ခိုက်ခဲ့တယ်လို့ ဆိုပါတယ်။
ဒေသခံ အမျိုးသားတစ်ဦးက “လက်ရှိတော့ ဆင်တောင်ကျောင်းနားလို့ သိရပါတယ်။ ထိခိုက်ဒဏ်ရာ ရတာမျိုးလည်း ရှိပါတယ်။ အတိအကျတော့ မသိသေးဘူး။ ဂေါ်ရခါးတွေ နေထိုင်တဲ့ ရပ်ကွက်ပါ” လို့ ပြောပါတယ်။
ဗုံးကြဲတိုက်ခိုက်မှုနဲ့ ပတ်သက်ပြီး ရွှေဖီမြေအနေနဲ့ ဆက်လက် စုံစမ်းနေဆဲ ဖြစ်ပါတယ်။
ဒါ့အပြင် ဒီနေ့ ဩဂုတ် ၂၅ ရက် မနက် ၁၁ နာရီခွဲဝန်းကျင်မှာ ကျောက်မဲမြို့ ပိန္နဲကုန်း ဝါဆိုကျောင်းအနီးကို စစ်တပ်က ဂျက်လေယာဉ်နဲ့ ပေါင် ၂၅၀ ဗုံး ၂ လုံး ကြဲချခဲ့တာကြောင့် ကိုရင် ၃ ပါး ထိမှန်ဒဏ်ရာ ရခဲ့ပြီး နေအိမ် ၂၀ နီးပါးလည်း ပျက်စီးခဲ့ပါတယ်။
ဒီနေ့ညပိုင်းမှာလည်း မိုးမိတ်မြို့နယ်ထဲ လေကြောင်းကနေ ဗုံးကြဲခံရပေမဲ့ ထိခိုက်သေဆုံးမှုကတော့ မသိရသေးပါဘူး။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
