ရွှေဖီမြေ၊ ဇန်နဝါရီ ၇ ရက်၊ ဝက်လက်
စစ်ကိုင်းတိုင်း ဝက်လက်မြို့နယ် အုန္နဲဘုတ်ရွာဘက် စစ်ကြောင်း ထိုးလာတဲ့ စစ်ကောင်စီစစ်ကြောင်း တိုက်ခိုက်ခံရပြီး ၂၀ ကျော် သေဆုံးခဲ့တဲ့အပြင် ၃ ဦး အရှင်ဖမ်းမိခဲ့တယ်လို့ ရွှေဘိုခရိုင် အမှတ်(၁၈) တပ်ရင်းက မနေ့ ဇန်နဝါရီ ၆ ရက်မှာ ထုတ်ပြန်ထားပါတယ်။
ဇန်နဝါရီ ၅ ရက်မှာ အုန္နဲဘုတ်ရွာဘက် အင်အား ၇၀ ဝန်းကျင်နဲ့ စစ်ကြောင်း ထိုးလာတဲ့ စစ်ကောင်စီ တပ်မ ၃၃ ကို တော်လှန်ရေး ပူးပေါင်းတပ်ဖွဲ့က ဝင်ရောက် တိုက်ခိုက်ခဲ့တာလို့ ဆိုပါတယ်။
တိုက်ပွဲအတွင်း MA-1 ၅ လက်၊ လက်ပစ်ဗုံး ၂ လုံး၊ ရှေ့ထွက်မိုင်း တစ်လုံး၊ မြင်းခွာနင်းမိုင်း ၄ လုံး၊ ဒရုန်းဖြတ်စက် ၁ ခု၊ ၆၀ မမဗုံးသီး ၃ လုံးနဲ့ တခြားစစ်အသုံးအဆောင်ပစ္စည်းတွေကိုလည်း သိမ်းဆည်းရမိခဲ့တယ်လို့ ဓာတ်ပုံနဲ့တကွ ထုတ်ပြန်ထားပါတယ်။
တိုက်ပွဲ ၅ နာရီအတွင်း စစ်တပ်ဘက်က ဂျက်ဖိုက်တာ ၄ စီးနဲ့ အကြိမ် ၂၀ ကျော် ဗုံးကြဲတိုက်ခိုက်ခဲ့ပြီး တော်လှန်ရေး ပူးပေါင်းတပ်ဖွဲ့ဘက်က ၅ ဦး ဒဏ်ရာအနည်းငယ် ရခဲ့တယ်လို့လည်း ဆိုပါတယ်။
အဲဒီတိုက်ပွဲမှာ ရွှေဘိုခရိုင် အမှတ် ၁၈၊ ၂၃၊ ကြောင်လက်သည်းတပ်ဖွဲ့၊ တပ်ရင်း(၁၈) တပ်ခွဲ(၁) ဝက်လက်မင်းသားကြီးအဖွဲ့၊ တပ်ခွဲ(၂) Pro Life အဖွဲ့ တပ်ခွဲ(၃) ဗိုလ်သင်္ချိုင်းအဖွဲ့၊ တပ်ခွဲ(၄) ဗိုလ်ကျားကြီးအဖွဲ့၊ ဝက်လက်ဒေါင်းနီအဖွဲ့နဲ့ ဒေါင်းစစ်သည်အဖွဲ့တို့ ပူးပေါင်းတိုက်ခိုက်ခဲ့တာ ဖြစ်ပါတယ်။
ပြီးခဲ့တဲ့ ဇန်နဝါရီ ၄ ရက် (လွတ်လပ်ရေးနေ့) ည ၁၀ နာရီကျော်ကလည်း အုန္နဲဘုတ်ရွာထဲကို စစ်တပ်က စစ်ကြောင်း ထိုးလာပြီး ရမ်းသမ်းပစ်ခတ်ခဲ့တာကြောင့် ဒေသခံတွေက ညတွင်းချင်း ဘေးလွတ်ရာ ထွက်ပြေးတိမ်းရှောင်ခဲ့ရတယ်လို့ ဒေသခံတွေက ပြောပါတယ်။
