ဝတ်ရည်၊ ဇူလိုင် ၁၅ ရက်၊ အရာတော်
စစ်ကိုင်းတိုင်း အရာတော်မြို့နယ်မှာ စစ်ကောင်စီတပ်က လေကြောင်းကနေ ဗုံးကြဲတိုက်ခိုက်လို့ ကိုယ်ဝန်ဆောင်မိခင်အပါအဝင် ၃ ဦးသေဆုံးခဲ့ရတယ်လို့ ဒေသခံ အမျိုးသားတစ်ဦးက ရွှေဖီမြေကို ပြောပါတယ်။
မနေ့ ဇူလိုင် ၁၄ ရက် နေ့လယ် ၄ နာရီဝန်းကျင်မှာ အရာတော်မြို့နယ် ကံရင်းကျေးရွာအတွင်း လက်ဖက်ရည်ဆိုင်ကို ဗုံးကြဲတိုက်ခိုက်ခဲ့တာလို့ ဆိုပါတယ်။
“အဲရွာမှာက တိုက်ပွဲဖြစ်ပွါးတာ မရှိခဲ့ပါဘူး။ လက်ဖက်ရည်ဆိုင်နဲ့ အနီးဝန်းကျင်မှာ ဗုံး ၃ လုံးလောက် လာချသွားတာ။ မိနစ်ပိုင်းပဲခြားပြီး ကြဲသွားတာ။ ကိုယ်ဝန်ဆောင်ရဲ့ ဗိုက်ထဲကလေး အသက်ရှင်မယ်ထင်လို့ မွေးထုတ်ကြသေးတယ်။ မွေးတဲ့အချိန်မှာတော့ အသက်မရှိတော့ဘူး”
စစ်ကောင်စီတပ်ရဲ့ လေကြောင်းတိုက်ခိုက်မှုကြောင့် ကိုယ်ဝန်ဆောင်မိခင်အပါအဝင် အမျိူးသမီး ၂ ဦးနဲ့ ကလေးငယ် ၁ ဦးတို့ သေဆုံးခဲ့ရပြီး အမျိုးသား ၁ ဦး ထိမှန်ဒဏ်ရာရရှိခဲ့တယ်လို့ အထက်ပါ ဒေသခံက ပြောပါတယ်။
အထက်ပါဖြစ်စဉ်နဲ့ အလားတူ ပြီးခဲ့တဲ့ ဇွန်လ ၁၇ ရက် နေ့လယ် ၁ နာရီဝန်းကျင်မှာလည်း ဝက်လက်မြို့နယ် ညောင်ပင်ကြီးတောရွာကကိုယ်ဝန်ဆောင်အမျိုးသမီး မွေးဖွားမယ့်ရက်မှာ စစ်ကောင်စီတပ်က ဂျက်ဖိုက်တာ ၁ စီးနဲ့ လေကြောင်းကနေ ၂ ကြိမ် ဗုံးကြဲတိုက်ခိုက်ခဲ့တာကြောင့် မိခင်နဲ့ ကလေးအပါအဝင် ဒေသခံ ၄ ဦး သေဆုံးခဲ့ပါတယ်။
စစ်တပ်ဟာ ၎င်းတို့ လက်လွှတ်ခဲ့ရတဲ့ စစ်ကိုင်းတိုင်းက နယ်မြေကိုတွေ မြေပြင်ထိုးစစ်တွေ လုပ်ဆောင်နေသလို လက်နက်ကြီးနဲ့ လေကြောင်း ဗုံးကြဲတိုက်ခိုက်မှုတွေလည်း ဆက်တိုက်လုပ်ဆောင်တာကြောင့် ဒေသခံ ထိခိုက်သေဆုံးမှုလည်း ဆက်ရှိနေပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
