ရွှေဖီမြေ၊ မေလ ၈ ရက်
ပြီးခဲ့တဲ့ ဧပြီလ တစ်လအတွင်း စစ်တပ်ရဲ့ လေကြောင်းတိုက်ခိုက်မှုနဲ့ မြေပြင်တိုက်ခိုက်မှုတွေကြောင့် နိုင်ငံတဝှမ်းက အမျိုးသမီး ၄၄ ဦးသေဆုံးခဲ့ပြီး ၅၇ ဦး ဒဏ်ရာရခဲ့တယ်လို့ မြန်မာအမျိုးသမီး သမဂ္ဂ(BWU)က ဒီနေ့ မေလ ၈ ရက်မှာ ထုတ်ပြန်ထားပါတယ်။
စစ်တပ်ရဲ့ လေကြောင်းတိုက်ခိုက်မှုကြောင့် ၃၆ ဦး၊ မတရားသတ်ဖြတ်ခံရသူ ၄ ဦး၊ လက်နက်ကြီး ပစ်ခတ်မှုကြောင့် ၂ ဦးနဲ့ ကျဥ်ထိမှန်မှုကြောင့် ၂ ဦး စုစုပေါင်း ၄၄ ဦး သေဆုံးခဲ့တာဖြစ်ပါတယ်။
အဲဒီ သေဆုံးသူ ၄၄ ဦးထဲမှာ မန္တလေးတိုင်းက ၁၁ ဦး၊ စစ်ကိုင်းတိုင်း ၈ ဦး၊ ကရင်ပြည်နယ် ၆ ဦး၊ ပဲခူးတိုင်း ၄ ဦး၊ ရခိုင်ပြည်နယ် ၄ ဦး၊ ကချင်ပြည်နယ် ၃ ဦး၊ ချင်းပြည်နယ် ၃ ဦး၊ မကွေးတိုင်း ၂ ဦး၊ ကရင်ပြည်နယ် ၂ ဦးနဲ့ တနင်္သာရီတိုင်းက ၁ ဦး ပါဝင်တယ်လို့ ဖော်ပြထားပါတယ်။
ဒါ့အပြင် လေကြောင်းတိုက်ခိုက်မှုကြောင့် ၄၅ ဦး၊ လက်နက်ကြီးပစ်ခတ်မှုကြောင့် ၆ ဦး၊ မြေမြှုပ်မိုင်းကြောင့် ၅ ဦးနဲ့ ကျည်ထိမှန်မှုကြောင့် ၁ ဦး စုစုပေါင်း ၅၇ ဦး ဒဏ်ရာရခဲ့တယ်လို့ ဆိုပါတယ်။
အလားတူ ပြီးခဲ့တဲ့ မတ်လ တစ်လအတွင်းမှာလည်း စစ်တပ်ရဲ့ လေကြောင်းတိုက်ခိုက်မှုနဲ့ မြေပြင်တိုက်ခိုက်မှု့တွေကြောင့် နိုင်ငံတဝှမ်းက အမျိုးသမီး ၈၈ ဦးသေဆုံးခဲ့ပြီး ၅၄ ဦး ဒဏ်ရာရခဲ့တယ်လို့ BWU က ပြီးခဲ့တဲ့ ဧပြီ ၇ ရက်မှာ ထုတ်ပြန်ထားပါတယ်။
စစ်ကောင်စီတပ်ဟာ ရွေးကောက်ပွဲ ပြုလုပ်ပြီးနောက် အစိုးရတရပ် ပုံစံပုံဖော်နေပေမဲ့ လက်တွေ့မှာ နိုင်ငံတဝှမ်း လေကြောင်းတိုက်ခိုက်တာ၊ ပြည်သူတွေကို အစုအလိုက် အပြုံလိုက် သတ်ဖြတ်တာ၊ ညှင်းပန်း နှိပ်စက်တာတွေ လုပ်နေတယ်လို့ BWU က ပြောပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
