ဆုမွန်၊ ဖေဖော်ဝါရီ ၂၃ ရက်၊ လားရှိုး
ရှမ်းမြောက် လားရှိုးမြို့နယ် နမ့်လန်ကျေးရွာက အသက် ၁၈ နှစ်အရွယ်ရှိတဲ့ မဥက္ကာမွန်ဆိုသူ အမျိုးသမီးတစ်ဦးဟာ တရုတ်ပြည်မှာ ယွမ် ၈ သောင်း (ငွေကျပ် သိန်း ၄၀၀ ကျော်)နဲ့ လူကုန်ကူးခံရပြီး ပျောက်ဆုံးသွားခဲ့တယ်လို့ မိသားစုဝင်တွေဆီက သိရပါတယ်။
မဥက္ကာမွန်ဟာ ပြီးခဲ့တဲ့ ၂၀၂၄ ခုနှစ် မတ်လ ၆ ရက်နေ့မှာ နေအိမ်ကနေ ထွက်သွားရာကနေ အခုလို လူကုန်ကူးခံရတာဖြစ်ပါတယ်။
ရန်ကုန်မြို့မှာ နေထိုင်တဲ့ ပွဲစားလုပ်သူ မခိုင်ဝင်းထက်ဆိုသူက လိမ်လည်ခေါ်ယူပြီး တရုတ်ပြည်ထဲက မြို့တစ်မြို့မှာ ယွမ် ၈ သောင်းနဲ့ ရောင်းစားခဲ့တာလို့ သူ့ရဲ့ မိသားစုဝင်တစ်ဦးက ရွှေဖီမြေကို ပြောပါတယ်။
“၂၀၂၄ ခုနှစ် ဇွန်လ ၃၀ ရက်မှာ သူနဲ့ နောက်ဆုံး အဆက်အသွယ်ပြန်ရတယ်။ သူပြောတာတော့ သူတရုတ်ပြည်မှာ ရောင်းစားခံရတယ်။ ယွမ် ၈ သောင်းနဲ့တဲ့။ ရဲတွေက သူ့ကို ဖမ်းမိလို့ ဆင်ဖြူပေါက်ဘက် ပို့ပေးမယ်တဲ့။ အဲချိန်ကတည်းက သူနဲ့ အဆက်အသွယ်မရတော့တာ။”
မဥက္ကာမွန် ပျောက်ဆုံးနေတာ အခုနဲ့ဆိုရင် ၂ နှစ်နီးပါးကြာ ရှိနေပြီဖြစ်ပြီး သူမ ပျောက်ဆုံးနေကြောင်းကို မိသားစုဝင်တွေက တရုတ်-မြန်မာ သံရုံးမှာ တိုင်ကြားထားသော်လည်း လက်ရှိအချိန်အထိ ဘာမှ အစအနမှ မရသေးဘူးလို့ ဆိုပါတယ်။
သူမပျောက်ဆုံးနေတာနဲ့ ပတ်သက်ပြီး မိသားစုဝင်တွေက ပူပန်နေပြီး ၎င်းကို တွေ့ရှိပါက မိသားစုဝင်ဖုန်းတွေဖြစ်တဲ့ 09 686 000 465, 09 777 782 545 ကို ဆက်သွယ်အကြောင်းကြားပေးဖို့ အကူအညီတောင်းခံထားပါတယ်။
နယ်စပ်မြို့ဖြစ်တဲ့ မူဆယ်မြို့မှာ အလုပ်အကိုင်ရှာဖွေရင်း အခုလို ပွဲစားတွေရဲ့ လိမ်လည်ခံရတာတွေ မကြာခဏ ကြုံနေပြီး ပြီးခဲ့တဲ့ ဖေဖော်ဝါရီ ၁၂ ရက်တုန်းကလည်း အမျိုးသမီး ၈ ဦးကို လူကုန်ကူးဖို့ လုပ်နေတဲ့ အမျိုးသား ၃ ဦးနဲ့ အမျိုးသမီး ၁ ဦးကို ညီနောင်မဟာမိတ် ၃ ဖွဲ့ ထိန်းချုပ်တဲ့ ၁၀၅ မိုင် ကျင်စန်းကျော့မှာ ဖမ်းမိခဲ့ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
