မြတ်နိုး၊ ဇူလိုင် ၁၆၊ ကံပိုင်တည်
ကချင်ပြည်နယ်၊ တရုတ် – မြန်မာ နယ်စပ်ကုန်သွယ်ရာ အဓိကလမ်းကြောင်းတစ်ခုဖြစ်တဲ့ မြစ်ကြီးနား – ကံပိုင်တည် လမ်းမှာ မိုးအဆက်မပြတ် ရွာသွန်းလို့ ဇူလိုင်လ ၁၅ ရက်နေ့က မြေတွေပြိုလို့ လမ်းတွေ ထပ်ပိတ်သွားကြောင်း ကုန်တင်ယာဉ်မောင်းတွေဆီက သိရပါတယ်။
“အရင်ရက် ပြိုတဲ့ နားကတော့ လမ်းပွင့်သွားပြီ။ မနေ့ ဇူလိုင်လ ၁၅ ရက် မနက်က ထပ်ပြိုတာ။ ရေတံခွန်နားမှာ။ ကားလဲထားတာတွေလည်းရှိတယ်။ မြေတခြမ်းပိသွားတဲ့ ကားတွေလည်း ရှိတယ်” လို့ ကုန်တင်ယာဉ်မောင်း တစ်ဦးက ပြောပါတယ်။
ကုန်သွယ်ရာ လမ်းမတလျှောက် နေရာ ၁၀ ခု ထက်မနည်း တောင်တွေ ထပ်ပြိုထားပြီး တချို့ နေရာတွေမှာတော့ ဆိုင်ကယ်တွေတောင် သွားလို့မရတော့လောက်အောင် ဖြစ်သွားရတယ်လို့ သူက ပြောပါတယ်။
“မနက်အစောပိုင်း ကားပေါ် အိပ်နေတုန်း ပြိုလာတာ။ ကံကောင်းလို့ လူတွေ ဘာမှ မဖြစ်တာ။ ကားတောင်လွင့်တယ်” လို့ နောက်ထပ် ယာဉ်မောင်း တစ်ဦးက ပြောပါတယ်။
မြေပြိုထားတဲ့ နေရာတွေမှာ ကားသေးရော ကုန်ကားတွေပါ ပိတ်မိနေတာရှိပြီး ရေတံခွန်နားမှာတော့ ကုန်ကား ၂ စီး တခြမ်း မြေပိထားတာရှိသလို အိမ်ဆိုင်တစ်ဆိုင်လည်း အနည်းငယ် ထိထားတယ်လို့ ဆိုပါတယ်။
မိုးသည်းထန်စွာ ရွာသွန်းမှုကြောင့် မြစ်ကြီးနား – ဆဒုံး – ကံပိုင်တည်လမ်းမကြီးပေါ် အင်ဝမ်းကောင်၊ ဆနာ၊ ဒိန်ဂီ စတဲ့ နေရာ ၁၀ နေရာကျော်မှာ ဇူလိုင် ၁၅ ရက်နေ့ မနက်ပိုင်းက မြေပြို လမ်းပိတ်သွားတာကြောင့် ခရီးသွားတွေ ယာယီ ရပ်နားထားရကြောင်း လိုင်ဇာ FM ကလည်း သတင်းထုတ်ပြန်ထားပါတယ်။
လက်ရှိမှာတော့ တောင်ပြိုထားတဲ့ နေရာတွေမှာ ရှင်းလင်းပြုပြင်နေကြောင်း ဒေသခံတွေနဲ့ ယာဉ်မောင်းတွေဆီက သိရပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
