အလင်း၊ ဇွန်လ ၁၇ ရက်၊ ကျောက်တော်
ရခိုင်ပြည်နယ်၊ ကျောက်တောမြို့က ပိုက်သည်နဲ့ လမ်းမတော်ရပ်ကွက်ကို စစ်ကောင်စီတပ်က လေကြောင်း ဗုံးကြဲတိုက်ခိုက်ခဲ့ပြီး ကလေးငယ်တစ်ဦးအပါအဝင် ၇ ဦး သေဆုံးခဲ့တယ်လို့ ဒေသခံတွေက ရွှေဖီမြေသို့ ပြောပါတယ်။
မကွေး၊ တံတားဦးနဲ့ နေပြည်တော်လေတပ်တို့မှ တက်လာတဲ့ ဂျက်ဖိုက်တာ ၃ စီးနဲ့ ဒီနေ့ ဇွန်လ ၁၇ ရက် နေ့လယ် ၂ နာရီ ၅၀ မိနစ်မှ ၃ နာရီ ၄၀ မိနစ်အထိ ကျောက်တော်မြို့နဲ့ အနီးဝန်းကျင်ရှိ နေရာ ၆ ခုထက်မနည်းကို ဗုံး ၁၄ လုံး ကြဲချတိုက်ခိုက်ခဲ့တာဖြစ်ပါတယ်။
အဲဒီလလေကြောင်းတိုက်ခိုက်မှုကြောင့် ပိုက်သည်ရပ်ကွက်က ယာယီစျေးမှာ အလုပ်လုပ်ကိုင်နေသူ ၄ နှစ်အရွယ် ကလေးငယ်တစ်ဦးအပါအဝင် အရပ်သား ၇ ဦး နေရာမှာ သေဆုံးခဲ့ပါတယ်။
“လေယာဉ်သံကြားတာနဲ့ လူတွေက ပြေးကြပေမယ့် မလွတ်မြောက်လိုက်ကြဘူး။ စျေးသည်တွေနဲ့ ဝယ်သူတွေ ပြေးစရာလမ်းမရှိအောင် ဗုံးတွေက တဆက်တည်း ကြဲချတာ” လို့ ကျောက်တော်ဒေသခံတစ်ဦးက ရွှေဖီမြေသို့ ပြောပါတယ်။
ဒါ့အပြင် ပြည်သူ ၁၀ ဦးထက်မနည်း ထိခိုက်ဒဏ်ရာရရှိခဲ့ပြီး နေအိမ်အများအပြား ပျက်စီးဆုံးရှုံးခဲ့ရပါတယ်။
လက်ရှိမှာ ထိခိုက်ဒဏ်ရာရရှိသူများပြားတာကြောင့် သေဆုံးသူအရေအတွက် ထပ်မံတိုးလာနိုင်တယ်လို့ သိရပါတယ်။
“ရပ်ကွက်ထဲက လူနေအိမ်တွေ အကုန်ပျက်စီးသွားတယ်။ အခုအချိန်ထိ မီးခိုးတွေ မငြိမ်းသေးဘူး။ လူတွေရဲ့ အလောင်းတွေကလည်း စျေးထဲမှာပဲ ပျံ့ကျဲနေတယ်။ ကယ်ဆယ်ရေး မလုပ်နိုင်ကြသေးဘူး ” အထက်ပါ ဒေသခံတစ်ဦးက ရွှေဖီမြေသို့ ပြောပါတယ်။
အာရက္ခတပ်တော် (AA) နဲ့ တိုက်ပွဲတွေမှာ စစ်ရှုံးနေတဲ့ စစ်ကောင်စီတပ်ဟာ အခုလို စစ်ရေးနဲ့ မသက်ဆိုင်တဲ့ အရပ်သားပြည်သူတွေကို အဓိကပစ်မှတ်ထား တိုက်ခိုက်လျက်ရှိပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
