နော်ဂျား၊ ဇန်နဝါရီ ၂၉ ရက်၊ မူဆယ်
စစ်ကောင်စီထိန်းချုပ်တဲ့ ရှမ်းမြောက် နယ်စပ်မြို့ဖြစ်တဲ့ မူဆယ်မြို့က ဂိမ်းရုံတစ်ခုမှာ အမျိုးသား ၂ ဦးကို ပြည်သူ့စစ်တွေက ဝိုင်းရိုက်လို့ သေဆုံးသွားခဲ့တယ်လို့ အမည်မဖော်လိုသူ မျက်မြင်တစ်ဦးက ရွှေဖီမြေကို ပြောပါတယ်။
မနေ့ ဇန်နဝါရီလ ၂၈ ရက် ည ၉ နာရီခွဲအချိန်မှာ စွမ်စော် (၁) လမ်းရှိ ဆိုင်းဘုတ်မရှိတဲ့ ဂိမ်းရုံရှေ့ကို ဆေးလိပ်တို လွှတ်ပစ်ခဲ့တာကြောင့် ဂိမ်းရုံစောင့်တဲ့ မန်ပိန်းပြည်သူ့စစ် ၃ ဦးက ၎င်းတို့ကို မရိုသေလို့ဆိုပြီး ဝိုင်းပြီးရိုက်နှက်ရာမှာ သေဆုံးခဲ့တာလို့ ဆိုပါတယ်။
သေဆုံးသူ နှစ်ဦးဟာ ကိုအောင်မြင့်သိန်း (၃၁) နှစ်နဲ့ မှုန်ကြီး (၄၉) နှစ်အရွယ်ဆိုသူဖြစ်ပြီး သူတို့နှစ်ဦးဟာ စွမ်စော်(၁)လမ်း ဂိမ်းဆိုင်အနီးက ရာအိမ်မှူးဦးအောင်ဆာရဲ့ အိမ်အနီးမှာ အိမ်ငှါးနေကြသူဖြစ်တယ်လို့ သိရပါတယ်။
“သူတို့က ဆေးလိပ်တိုကို ရိုးရိုးပစ်လိုက်တာပါ။ ဒါကို ဆေးချထားတဲ့ပြည်သူ့စစ်က သူတို့ကို မရိုမသေလုပ်ရမလားဆိုပြီး ဆဲရာကနေ ရန်ဖြစ်ကြတာ။ သူတို့က ဘာမှပြန်မလုပ်ဘူး တောင်းပန်နေတာကို ပြည်သူ့စစ် (၃) ယောက်က ဝင်ထိုး ဝင်ရိုက်ကြတာ။ သေမှ အရိုက်ရပ်သွားတာ”လို့ ပြောပါတယ်။
အဲဒီဂိမ်းဆိုင်ကို သွားရောက်ကြည့်ရှုရာမှာ ဘာဖြစ်စဉ်မှ မဖြစ်ခဲ့တဲ့ပုံစံမျိုးနဲ့ မြင်တွေခဲ့ရပြီး ဆိုင်လည်း ဆက်လက်ဖွင့်လှစ်ထားတာကိုလည်း တွေ့ရှိခဲ့ရတယ်လို့ ဆိုပါတယ်။
ဒါ့အပြင် ရိုက်နှက်မှုကြောင့် သေဆုံးသူ အမျိုးသား ၂ ဦးရဲ့ ရုပ်အလောင်းကိုလည်း ဖျောက်ဖျက်ပစ်လိုက်တဲ့သဘောမျိုးလို့ ယူဆရတယ်လို့ ဆိုပါတယ်။
သေဆုံးသူနှစ်ဦးရဲ့ နေထိုင်တဲ့ အိမ်ကို သွားရောက်မေးမြန်းခဲ့ရာမှာလည်း “ညကတည်းက ထွက်သွားတာပဲ။ အခုထိ ပြန်မရောက်သေးဘူး။ သူတို့နှစ်ယောက်က တစ်ခန်းထဲနေကြတာ။ ဘာဖြစ်လို့လဲ”လို့ အိမ်ရှင်က ပြောခဲ့တယ်လို့ ဆိုပါတယ်။
သေဆုံးသူနှစ်ဦးဟာ မန္တလေးမြို့ မြောက်ပြင်ရပ်ကွက်ရှိ အရိပ်မထွက်ဘုရားအနီး အောင်မြင်သူ ဆံပင်ညှပ်ဆိုင်မှာ နေထိုင်သူတွေဖြစ်ကြောင်း သိရပါတယ်။
၎င်းတို့ နှစ်ဦးဟာ လွန်ခဲ့တဲ့ ၂၀၂၄ ခုနှစ်ကတည်းက မူဆယ်မြို့သို့ ရောက်ရှိနေပြီး ကျပန်းအလုပ် လုပ်ကိုင်နေသူတွေ ဖြစ်တယ်လို့လည်း သိရပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
