ရွှေဖီမြေ၊ မေလ ၁ဝ ရက်၊ မန်တုံ
တအာင်းဒေသ မန်တုံမြို့နယ် စေကော်နဲ့ပန်ခါးလေးကျေးရွာမှာ မြို့နယ် တအာင်းရဲတပ်ဖွဲ့က မူးယစ်ဆေးဝါး ရောင်းဝယ်သူ ၂ ဦးနဲ့ သုံးစွဲသူတစ်ဦးကို ဖမ်းဆီးရမိခဲ့ကြောင်း တအာင်းတပ်ဘက်က မနေ့ မေလ ၉ ရက်မှာ ထုတ်ပြန်လာပါတယ်။
ပြီးခဲ့တဲ့ ဧပြီ ၂၄ ရက်က မူးယစ်ဆေးဝါး ရောင်းဝယ်သူ အသက် ၅၆ နှစ်အရွယ် ဒေါ်ယေနုနဲ့ ၂၉ နှစ်အရွယ် ဦးအောင်ခိုင်တို့ဆီကနေ စိတ်ကြွဆေးပြား ၅၉၀ ပြား၊ ဘိန်းဖြူထည့်တဲ့ ဆပ်ပြာခွက် ၁ ခွက် ဖမ်းဆီးရမိခဲ့တာပဲ ဖြစ်ပါတယ်။
ဒါ့အပြင် ပန်ခါးလေးရွာမှာလည်း ဧပြီ ၂၃ ရက်က မြို့နယ်တအာင်းရဲတပ်ဖွဲ့က ရှောင်တခင် စစ်ဆေးစဉ် မူးယစ်ဆေးဝါး သုံးစွဲသူ အသက် ၅၀ နှစ်အရွယ် ဦးအမင်းဆီကနေ စိတ်ကြွဆေးပြား ၅၇ ပြား၊ ဘိန်းဖြူ ၁.၁ ဂရမ်နဲ့ တခြားသက်သေခံပစ္စည်းတွေကို ဖမ်းဆီးရမိခဲ့တယ်လို့ ဆိုပါတယ်။
ဖမ်းဆီးရမိတဲ့ မူးယစ်ဆေးဝါး ရောင်းဝယ်သူကို ပလောင်ပြည်နယ် လွတ်မြောက်ရေးတပ်ဦး- PSLF/TNLA က မူးယစ်ဆေးဝါး တိုက်ဖျက်ရေးဥပဒေနဲ့အညီ အရေးယူ ဆောင်ရွက်သွားမှာဖြစ်ပြီး သုံးစွဲသူကိုလည်း အကျင့်စာရိတ္တ ပြုပြင်ပေးသွားမှာဖြစ်ကြောင်း ဆက်လက် ဖော်ပြထားပါတယ်။
မန်တုံမြို့နယ်ကို ၁ဝ၂၇ စစ်ဆင်ရေး ပထမလှိုင်းဖြစ်တဲ့ ၂ဝ၂၃ ဒီဇင်ဘာ ၂၂ ရက်မှာ တအာင်းတပ်မတော်က တိုက်ခိုက်သိမ်းပိုက်ခဲ့တာဖြစ်ပြီး အုပ်ချုပ်ရေးယန္တရား လည်ပတ်နေပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
