ပို့လဘား၊ ဇူလိုင် ၃ ရက်၊ မူဆယ်
စစ်ကောင်စီတပ် ထိန်းချုပ်ထားတဲ့ ရှမ်းမြောက် မူဆယ်မြို့မှာ ပြည်သူ့စစ်တစ်ဦး မောင်းနှင်လာတဲ့ကားက ကုန်စုံဆိုင်တစ်ခုကို ဝင်တိုက်ခဲ့ကြောင်း ဒေသခံတွေဆီက သိရပါတယ်။
ဖြစ်စဉ်ဟာ ဒီနေ့ ဇူလိုင်လ ၃ ရက် မနက် ၈ နာရီကျော်မှာ ဖြစ်ခဲ့တာဖြစ်ပြီး မူဆယ်မြို့ မန်ဝိန်း လမ်းမကြီးအနီးရှိတဲ့ ကုန်စုံဆိုင်ထဲကို ကားတစ်စီး အရှိန်နဲ့ မောင်းဝင်သွားခဲ့တာ ဖြစ်ပါတယ်။
“ကားကပြည်သူ့စစ် မောင်းလာတဲ့ကားပဲ။ သူမူးပြီးမောင်းလာတာလားမသိဘူး။ မန်ဝိန်းလမ်းမှာရှိတဲ့ သုံးထောင့်အကွေ့မှာ ဖြစ်သွားတာ။ မြဝတီဘဏ်ရှေ့က ကုန်စုံဆိုင်ကို ဝင်တိုက်ပြီး ဆိုင်ရှင်က မိန်းကလေးတစ်ယောက်ကိုလည်း ထိသွားတယ်။ သူတို့က ကားကို မောင်းချင်သလို မောင်းနေကြတယ်”
ဆိုင်ကို ဝင်တိုက်ပြီး ခဏအကြာမှာပဲ ဒေသခံနဲ့ သက်ဆိုင်ရာက သွားရောက် စစ်ဆေးပြီး အဲဒီကားမောင်းလာတဲ့သူကိုသက်ဆိုင်ရာတွေက ဖမ်းဆီးသွားခဲ့တာ ဖြစ်ပါတယ်။
လက်ရှိမှာတော့ ထိခိုက်ဒဏ်ရာရသွားတဲ့ အဲဒီဆိုင်ပိုင်ရှင်အမျိုးသမီးကို ရွှေလီမြို့ဘက်သို့ ဆေးကုသခံယူနေရတာ ဖြစ်တယ်လို့ ဆိုပါတယ်။
မူဆယ်မြို့နယ်ဟာ စစ်တပ်အပြင် ၎င်းရဲ့လက်အောက်ခံ ပြည်သူ့စစ်အဖွဲ့ပေါင်းစုံ သွားလာလှုပ်ရှားတဲ့နယ်မြေဖြစ်ပြီး ပြည်သူ့စစ်အချင်းချင်း ပစ်ခတ်တာတွေ မကြာခဏ ဖြစ်ပွားနေသလို ခိုးမှု၊ လုယက်မှု၊ ဓားပြတိုက်မှုနဲ့ ပြန်ပေးဆွဲတာတွေ မကြာခဏ ဖြစ်ပွားနေပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
